Morati: Zikaltërve u mungoi Ikardi, por Konte më pëlqen
“Juvja e ka të kotë me titullin e vitit 2006”
Masimo Morati dhe Juventusi. Një histori që diskutohet më shumë për sfidën nëpër gjykata sesa atë në fushën e lojës. Dhe pikërisht me këtë e nis ish-presidenti i Interit prononcimin e tij për mediat italiane kur pyetet për faktin që bardhezinjtë kanë bërë sërish apel të vendimit për titullin e vitit 2006. “Pas kaq shumë vitesh ata vazhdojnë të insistojnë. Kjo është një histori pa fund, por duhet të gjejnë dikë që nuk ka informacione në këtë histori dhe t’u japë të drejtë, në të kundërt është e pamundur”, tha fillimisht Morati. Pastaj diskutimi u spostua në fushën e lojës. “Interi bëri një pjesë të parë të mirë, të bukur dhe emocionuese. Luajtën mirë, por në të dytën nuk ishin aty ku duhet. Skuadra duhet të ketë vazhdimësi për të fituar titullin. Jam i bindur se mund t’ia dalë dhe do të luftojë deri në fund. Thënë këtë, kundërshtari i tyre (Juventusi) më duket shumë i fortë dhe për të fituar duhet një skuadër e fortë. Trajneri është shumë i rëndësishëm dhe Konten duket se e ndjekin. Është një goditje e zgjuar e drejtuesve. Juventusi është një ekip spektakolar falë bazës së fortë që ka ndërtuar Alegri”, vazhdoi më tej Morati.
IKARDI- Ai vazhdon të jetë një fans i çmendur i Mauro Ikardit dhe thotë se Lukakut i duhet kohë për t’u përshtatur. Fillimisht e krahason me sulmuesin e Juventusit: “Lukaku duhet të punojë për t’u përshtatur me futbollin italian, ka karakteristika të ndryshme nga Higuain dhe nuk mund t’i krahasoj dot. Ikardi? Nuk e di se çfarë ka ndodhur dhe nuk mund të jap një gjykim mbi situatën. Në aspektin sportiv, në ndeshjen ndaj Juventusit do të ishte shumë i vlefshëm dhe i rëndësishëm. Konte? Ka nisur një projekt ambicioz dhe puna e bërë deri tani është e shkëlqyer. Shpresoj që të arrijnë sa më larg, edhe pse këto projekte duan kohë. Zikaltrit duhet të synojnë të fitojnë Kupën e Italisë. Ajo është shumë e rëndësishme dhe u jep moral lojtarëve. Të fillosh të fitosh është një shenjë e rëndësishme dhe të sjell fat për të ardhmen. Stadiumi? Në vitet e fundit dëshira e njerëzve për t’u rikthyer në stadium është gjithmonë më e madhe dhe mendoj se stadiumet e rinj duhet të bëhen më të mëdhenj”,përfundoi fjalën e tij ish-presidenti i Interit.