Maloku e Qardaku "njëzëri": Do të luftojmë për fitore

Ditën e djeshme në stadiumin "Elbasan Arena", kanë dalë në konferencë për shtyp dy futbollistët e Kombëtares U-21, Eridon Qardaku dhe Leonardo Maloku. Kuqezinjtë folën në lidhje me grumbullimin, përgatitjet që po zhvillon tekniku Alban Bushi dhe pritshmëritë për sfidën ndaj Kosovës. Ndeshja e vlefshme për Grupin e 3-të kualifikues do të zhvillohet më 15 tetor në Elbasan. Optimizmi nuk mungon, edhe pse kuqezinjtë e vegjël nuk u kanë bërë një nisje të mirë këtyre kualifikueseve. Mjaft të përmendet që në 14 ndeshjet e fundit zyrtare, numëron vetëm një fitore. MALOKU - Për Leonardo Malokun, fitorja është detyrim ndaj Kosovës. "Atmosfera në skuadrën e Shpresave është shumë e mirë dhe kushtet janë optimale. Jemi të gjithë gati për përballjen e radhës ndaj Kosovës U-21 dhe jemi të përqendruar tek udhëzimet e trajnerit Bushi. Së bashku me shokët e skuadrës do të mundohemi të fitojmë ndeshjen e radhës ndaj Kosovës. Ne, si në çdo ndeshje, do të mundohemi të fitojmë. Edhe ndaj Kosovës do të luftojmë për të fituar. Për ne si futbollistë çdo takim me Kombëtaren është detyrim për t'u fituar dhe këtë duhet të bëjmë", u shpreh futbollisti i Shpresave në fjalën e tij para mediave. QARDAKU - Eridon Qardaku që aktivizohet në radhët e ekipit të Bylisit në Kategorinë Superiore u shpreh: "Skuadrës Kombëtare U-21 nuk i ka munguar asgjë, ndaj për ne është detyrim fitorja pasi kushtet janë shumë të mira. Gjërat janë pozitive, ne po përmirësohemi në disa aspekte edhe sipas analizës që kemi bërë më trajnerin gjatë përgatitjeve tona. Në ndeshjen e radhës ndaj Kosovës duhet të bëjmë kthesën e të shpresojmë deri në fund të këtyre kualifikueseve", pohoi në prononcimin e tij futbollisti i

Shpresave. Vladimir Mema