Kuman: Kujdes Irlandën, janë si makineri lufte
"Jam krenar që kam kapiten Van Dajkun. Ekipi është pak dembel"
Holanda është gji gantja e parë që do të zbresë në fushë gjatë ndeshjeve të kombëtareve në një ndeshje zyrtare. Për "tulipanët" nuk ka miqësore, por një kualifikuese shumë të rëndësishme ndaj Irlandës së Veriut në Roterdam. Me një fitore sonte, djemtë e Ronald Kumanit do të bënin një hap të rëndësishëm përpara, duke u barazuar me pikë me britanikët dhe Gjermaninë, përpara kualifikueses së ardhshme kundër Bjellorusisë në Minsk ditën e diel. Trajneri Ronald Kuman u shfaq i zhgënjyer në konferencën e djeshme për shkak të mungesës së kohës për të përgatitur ndeshjen e rëndësishme kundër irlandezëve. Çuditërisht ai nuk është as shumë i kënaqur nga impenjimi i lojtarëve të tij në stërvitje. "Irlanda është si një makineri luftarake. Ndoshta ata nuk kanë shumë cilësi teknike, por janë shumë direkt dhe përplasen ashpër. Janë një ekip që mund t'ia bëjë jetën të vështirë çdo skuadre. Duhet të jemi të përgatitur. Ata e treguan forcën e tyre me Gjermaninë për një orë. Formacioni? Kam gjithnjë dyshime për kë do të hedh në fushë. Në disa pozicione e kam të vështirë të vendos. Ndonjëherë vendos në bazë të stërvitjes. Nuk ka vend për nënvlerësim. Kemi përballë një skuadër shumë agresive dhe duhet të jemi me sytë hapur. Në disa seanca stërvitore nuk kam mbetur i kënaqur. Nuk mund të bëj ende gjithçka çfarë dua. Shoh gjëra që nuk më kanë pëlqyer. Nuk e di se çfarë është, ndoshta dembelizëm", tha holandezi, i cili nuk i kursen elozhet për kapitenin e tij, Virxhil Van Dajk. "Ai ka një personalitet të shkëlqyer dhe kjo është një nga arsyet përse ai është
kapiteni. Ai është një shembull për skuadrën dhe vendin. Jemi shumë krenarë që e kemi kapiten". Dhe në fund një përgënjeshtrim. Në mediat britanike thuhet se menaxheri i tij Rob Jansen, Denis Bergkamp, Dirk Kajt, suedezi Henrik Larson janë të interesuar për
të blerë klubin anglez të Uajkomb, klubin që kryeson Ligën e Parë. "Unë nuk kam fare lidhje. Menaxheri im ka një ëndërr të vjetër, të blejë një klub. Kanë kohë që punojnë. Mua më kanë marrë një mendim. Nuk e di sa pranë janë, por nuk investoj unë".