Gazidhis: Shpëtuam Milanin nga Seria D, me Piolin për Champions

Administratori: Kemi një plan 1.2-miliardësh për skuadrën

Gjatë prezantimit të trajnerit Stefano Pioli ishte edhe administratori i deleguar i klubit, Ivan Gazidhis, ai që e mori fjalën për të folur mbi situatën e Milanit, fillimisht në italisht dhe më pas në anglisht. “Po vazhdoj të studioj gjuhën tuaj, por nuk arrij ende që të flas me preçizionin që do të doja. Fillimisht dua të falënderoj Xhampaolon, një person të shkëlqyer dhe një trajner mjaft të mirë, i cili jam i bindur se do të bëjë mirë, kudo që do të shkojë. Në emër të stafit drejtues i uroj atij çdo të mirë të mundshme dhe pranoj se nuk ishte një vendim aspak i lehtë. Në të njëjtën kohë, e kuptojmë edhe frustrimin e tifozëve tanë, por dua të shpresoj që jemi të gjithë në të njëjtën barkë, duke bërë një udhëtim që nuk është i lehtë, por të cilin duam ta përfundojmë me sukses. E vërteta është se gjatë periudhës që ne kemi marrë drejtimin e klubit, na është dashur të punojmë për ta shpëtuar Milanin nga falimenti, e thënë ndryshe nga zbritja në Serinë D, siç u ka ndodhur shumë skuadrave të tjera. I sigurojmë tifozët tanë se po punojmë me shumë pasion dhe duam që të gjithë që të rikthehemi sa më lart që të jetë e mundur, jo vetëm në Itali, por edhe në Europë. Premtojmë se do të investojmë shumë, madje kemi gati një plan prej 1.2 miliardë eurosh, i cili përfshin edhe ndërtimin e një stadiumi ultramodern. Po këmbëngulim që ta bëjmë të mundur këtë, sepse në futbollin e sotëm vetëm kështu mund të rikthehesh të konkurrosh në botë. Edhe pse misioni është i vështirë, ne do të gjejmë rrugën e duhur, sepse jemi më të bashkuar se kurrë dhe vendimet i marrim të gjithë së bashku. E kemi përmirësuar skuadrën në verë dhe aktualisht jemi vetëm 4 pikë larg zonës Champions. Zgjedhja për të afruar Stefano Piolin në stolin tonë lidhet pikërisht me arritjen e këtij objektivi. Madje, jemi të bindur se kemi afruar një trajner ekspert, që di të punojë mbi të gjitha me lojtarët e rinj, që Milani i ka aktualisht me shumicë në grup”, përfundoi numri dy i kuqezinjve, Ivan Gazidhis.