Lazaro: Do t'i tregoj Kontes se sa vlej

Nga grumbullimi i kombëtares austriake, Valentino Lazaro, mesfushori i Interit, ka shprehur gjithë optimizmin e tij për një sezon pozitiv, pavarësisht hapësirës së paktë që ka pasur deri tani me zikaltrit: "Kur të duhet të përballesh brenda një jave me Lionel Mesin dhe Kristiano Ronaldon, ndihesh i lumtur. Për mua është vetëm etapa e parë në futbollin e madh, jam vetëm 23 vjeç. Shpresoj të rritem dhe të afirmohem sa më shpejt". Lazaro i ka idetë e qarta edhe për të vendosur në vështirësi Antonio Konten me zgjedhjet: "Çdo lojtar dëshiron të jetë gjithmonë në fushë, normalisht edhe unë kam ambiciet e mia. Gjatë javëve të ardhshme do t'i tregoj trajnerit se mund të luaj aq mirë saqë nuk do të jetë në gjendje të më harrojë më". OBJEKTIVA DHE AMBICIE Seria fituese e Interit ka ndikuar mbi vendimin e Kontes për të mos modifikuar zgjedhjet e formacionit: "Stërvitem me skuadrën çdo ditë, e di se çfarë kërkon trajneri dhe kam pasur reagime pozitive. Besimi qëndron akoma, edhe tek unë: shpresoj të shfrytëzoj në maksimum mundësitë e mia që me siguri do t'i kem javët e ardhshme. Roli im? Kam tipare më shumë sulmuese, por përshkoj gjithë krahun". Krahasuar me kohën te Herta e Berlinit, lojtari ka dalluar menjëherë diferencën në cilësi me Interin. "Po zhvillohem thuajse në çdo seancë stërvitore, aspekt mjaft normal nëse ke një trajner me eksperiencë të tillë apo shokë skuadre si ata që kam nga momenti i transferimit në Milano. Dhe shpresoj të rritem akoma kur të kem shanset e mia. Futbolli italian? Është më taktik, stërvitja zgjat më shumë, sepse një kohë e madhe u kushtohet detajeve taktike. Mund të qëndrojmë në fushë edhe për dy orë, edhe ky është një aspekt ku po rritem". Në përfundim, objektivat: "Gjithmonë jam shprehur se do të dëshiroja të luaja deri në moshën 35 vjeç dhe të rritem derisa të bëhem Valentino më i mirë e më pas të mësoj diçka tjetër".