Mjafton Hasani, Kosova kursehet me Gjibraltarin
Ekipi i Shaland e zotëroi në 68% të kohës topin, të hënën eliminatorja me Malin e Zi
Një miqësore që ndoshta mund të ishte shfrytëzuar shumë herë më mirë nga Kosova, edhe pse trajneri Shaland kishte lënë në tribunë një pjesë të mirë të titullarëve. Në stadiumin "Fadil Vokrri" të Prishtinës përfundon 1-0 përballë modestëve të Gjibraltarit, pas një goli të realizuar në mesin e pjesës së dytë nga Florent Hasani. Në një impiant të mbushur thuajse në kapacitetin maksimal, "Dardanët" vazhdojnë me rezultatet pozitive, edhe pse pjesa e parë la disi për të dëshiruar, duke parë edhe numrin e madh të rasteve. Kosovarët goditën 9 herë portën rivale, por impenjuan pak portierin e Gjibraltarit, një mungesë saktësie kjo, e cila nervozoi jo pak Bernard Shaland. Rastet më të pastra për avantazhin i patën Florent Muslija dhe Bernard Berisha, por mungoi shënjestra e duhur dhe gjakftohtësia, ndonëse zotërimi i topit ishte bindës (66 për qind). Pjesa e dytë për Kosovën nis me katër zëvendësime dhe niveli i lojës rritet ndjeshëm, sidomos shpejtësia
nga krahët e mesfushës dhe sulmit, që menjëherë u krijon shumë probleme miqve. Kastrati, Hasani dhe Paqarada, të cilët morën vendin e Zhegrovës, Muslijës dhe Kolollit ishin ata që bënë diferencën, duke lidhur aksionet mes mesfushës e sulmit. Dhe falë këmbënguljes së
tyre, erdhi edhe aksioni perfekt i minutës së 69-të: pas disa pasimesh të shpejta në mesin e fushës, Paqarada lirohet dhe shërbehet në korsinë e majtë, ku me të marrë topin në kontroll, sheh inkursionin në qendër të zonës së rreptësisë të Hasanit, të cilin e shërben dhe mesfushori
i Diosgorit godet me të majtën, teksa topi përfundon në rrjetë, pasi përplaset në kurrizin e Nuhiut. Goli çliron Kosovën, por mbi të gjitha ndez entuziazmin e tifozëve të shumtë të pranishëm, edhe pse në minutat e mbetura nuk do të shijojnë një gol të dytë. Rastin më të rrezikshëm
në fund e krijoi Kastrati, ku pas një tentative të parë që karamboloi në trupin e një kundërshtari, e dyta përfundoi ngjitur me shtyllën. Gjithsesi, mjafton edhe kaq për këtë miqësore, e cila ishte mbi të gjitha një stërvitje luksi, në pritje të eliminatores së të hënës,
kundër Malit të Zi. Trajneri Shaland, edhe pse kërkonte më shumë nga sulmi, mund të kënaqet me lojën, duke qenë se në fund, Kosova e mbylli me 68 për qind të zotërimit të topit dhe 21 tentativa të lëshuara drejt portës rivale, nga të cilat vetëm 9 në kuadrat.