Holanda, një përmbysje për infarkt
Dopietë e Depait, por "dritën" e ndezi goli i Luk De Jong
Ajo që dukej një dramë, një film i përsëritur vetëm 15 minuta nga fundi i ndeshjes së djeshme, pas mungesës në Botërorin e vitit të kaluar dhe në Europianin francez, është shndërruar papritur në një festë madhështore. Nëse 19 minuta (përfshirë edhe shtesën) që paraprinin vërshëllimën e trefishtë dje zgjatën sa një jetë për Irlandën e Veriut, për "tulipanët" vlejtën 3 kundërsulme të sakta, të duruara, ndoshta jo perfektë, por në të cilat erdhën 3 gola që përmbysin një ndeshje të luajtur me frikë. Gjithsesi, në fund ata që bëjnë të mundur një "mision të pamundur" janë pikërisht Memfis Depai dhe Luk De Jong: nëse sulmuesi i Lionit barazon shifrat në minutën e 80-të duke rindezur shpresat e përmbysjes, pas një goditjeje me majën e këpucës pak centimetra përballë portierit Farrell, ishte sulmuesi i Sevijes që gjen golin më të rëndësishëm të karrierës. Në të 91-ën, një krosim në zonë i Bergvajn devijohet me kokë nga Malen në shtyllën e dytë ku Luk De Jong është edhe me pak fat, sepse nuk godet pastër dhe topi ngrihet në ajër, ndonëse fatmirësisht nuk del jashtë në asnjë moment dhe me një goditje karateje De Jong e devijon saktë në rrjetë në tentativën e dytë. Holanda përmbys, Irlandës së Veriut i priten gjunjët, aq sa në aksionin pasardhës, Frenki De Jong rrëmben top në mesfushë, avancon i qetë drejt zonës dhe shërben për Depain që nga pozicion diagonal dërgon sërish në rrjetë. 3-1 për të zotët e shtëpisë, një përmbysje e çmendur për infarkt, por që mbi të gjitha u lejon portokallinjve që të katapultohen në krye të grupit, me pikë të barabarta me Gjermaninë. Dhe tani, bileta për në "Euro 2020" duket një lojë fëmijësh...