Qirinj, tortë dhe fjalim motivues, ja si u festua ditëlindja

Skuadra në grumbullim. Rreth orës 9 të mëngjesit të djeshëm Kombëtarja la tokën shqiptare për të fluturuar drejt Turqisë. Roshi? Dilemat me Memushajn? Si të ndal Burak Jilmaz e Tosun. Biseda me Dukën përgjatë gjithë fluturimit. Këto e shumë të tjera kanë shoqëruar italianin e Kombëtares dje. Mirëpo, pasi ekipi ka mbërritur në Turqi, e skuadra ka konsumuar drekën, ka qenë presidenti dhe stafi i FSHF-së që kanë menduar për një surprizë. Dje ishte ditëlindja e trajnerit të Kombëtares. Të gjithë duke ngrënë drekë dhe në momentin që menysë i ka ardhur radha për një ëmbëlsirë të përgatitur nga stafi, Armand Duka është futur në sallën e ngrënies me një tortë dhe qirinj. Edi Reja ka festuar me skuadrën ditëlindjen dhe teksa Duka e pyet a e ke menduar dëshirën, ai i fryn qirinjve dhe përgjigjet: Ti e di se çfarë dua unë (Qesh...)”. Më pas, italiani përqafon presidentin e FSHF-së. Kënga e ditëlindjes, festë por edhe një fjalim motivues nga italiani. Fjalë jete dhe përvoje... Ja si iu drejtua futbollistëve: “Fizikisht, jam akoma mirë për këtë moshë, por e dini cili është sekreti? Qëndroj gjithmonë me të rinjtë, pasi jam i ri në kokë. E kuptoni apo jo? Ku është ai përkthyesi im. (Duka i thotë: Mister, ata të gjithë kuptojnë italisht) Më dhatë një kënaqësi të jashtëzakonshme në ndeshjen kundër Islandës. Sepse jemi rritur dhe kjo gjë më lumturoi pa masë. Është shumë e rëndësishme të mbërrish në moshën time dhe të jesh në gjendje të japësh, por unë gjithashtu edhe marr shumë nga ju. Nesër në mbrëmje (sonte) do të doja dhe një dhuratë të vogël, nëse është e mundur. Do ta doja këtë kënaqësi të vogël, jo për vete, por për ju. Posaçërisht për ju. Sepse sipas meje po arrijmë, nuk them dot majat sepse është rrugë e gjatë, por jemi duke u përmirësuar vazhdimisht dhe jemi në rrugën e duhur. Do ta shikoni që do të ketë kënaqësi për të gjithë, sidomos për mua, meqë kam ditëlindjen”, u shpreh Reja, në një fjalim për ditëlindjen e tij që ka motivuar jo pak futbollistët.