Beqiri: Test para eliminatoreve, dua lojë dhe rezultate

Kombëtaret e moshave nisin grumbullimin për miqësore në prag të eliminatoreve të kësaj moshe, që zhvillohen në muajin nëntor.

Ekipi kombëtar U-17, i drejtuar nga trajneri Elvin Beqiri, është grumbulluar në qytetin e Shkodrës ku do të kryejë përgatitjet për dy ndeshjet miqësore, që do të zhvillojë ndaj Malit të Zi. Ndeshja e parë do të zhvillohet në stadiumin “Loro Boriçi”, më datë 13 tetor, në orën 14:00 dhe përballja e dytë në Malin e Zi më datë 16 tetor. Për këto sfida, trajneri Beqiri ka grumbulluar 24 futbollistë të datëlindjes 20032004. “Ne shpresojmë që grupi të shfaqi vlera në këto dy ndeshje, për t’i parë dhe pastaj për të zgjedhur grupin e duhur dhe bazë për grumbullimin e ardhshëm dhe atë më kryesorin. Kemi zhvilluar aktivitete miqësore apo dhe turne gjatë gjithë vitit e natyrisht që na kanë vlejtur që ta shohim elementin disa herë. Jemi munduar që të gjejmë lojtarët më të mirë që do të na vlejnë sidomos për ndeshjet zyrtare”, pohoi në fillim Beqiri. Këto përballje miqësore do të ndihmojnë trajnerin Beqiri të përzgjedhë futbollistët më të mirë për eliminatoret zyrtare të U-17 në muajin nëntor kundër Portugalisë, Ukrainës dhe Gjeorgjisë. “Portugalia është ekipi më i mirë, unë i njoh dhe i kam studiuar kundërshtarët. Shpresoj shumë që djemtë të luajnë mirë dhe sigurisht që të na bindin. Ka elementë cilësorë brenda grupit dhe pres shumë prej tyre. Natyrisht që vlen shumë ecuria, por edhe rezultati natyrisht që duhet, sepse është diçka që vlen shumë për këta djem, sidomos për moralin dhe vazhdimësinë”, tha trajneri shkodran.