Vllaznia, Partizani është... makth
Në mars të 2015-ës fitonin në limite me gol të Erald Çinarit, që aktualisht luan te “demat”
Vllaznia mund të quhet befasia më e bukur e këtij fillimsezoni. Një skuadër e ngjitur nga Kategoria e Parë po bashkëkryeson (me tri ekipe të tjera) kampionatin. Pasi mposhtën Kukësin, shkodranët tani duan edhe “kokën” e Partizanit. Fundjava e ardhshme do t’u rezervojë një ndeshje sa interesante, aq edhe delikate. Përballë do të kenë kampionët në fuqi të vendit dhe nën drejtimin e Mirsad Jonuz, skuadra është duke u përgatitur për ta kaluar me sukses këtë duel. E megjithatë, duhet thënë se statistikat nuk i kanë aspak në favor.
“TABUJA” - Mund ta themi se kuqeblutë kanë një “tabu” për të thyer. Partizani nuk na qenka vetëm makthi i Tiranës, por edhe i Vllaznisë. Nëse në derbi kanë plot 18 herë që nuk humbasin, të frikshme janë edhe shifrat përballë Vllaznisë. Zyrtarisht, nuk fitojnë ndaj të kuqve në 13 ndeshje radhazi. E fundit herë që kanë festuar, përkon me 8 marsin e 2015-ës, pra 4 vite e 7 muaj më parë. Ishte ai gol i Erald Çinarit në të 90-ën minutë që çoi peshë të pranishmit në “Loro Boriçi”. Dhe heroi i fundit, aktualisht mbron ngjyrat e fituesve të 16 titujve kampionë. Por që prej asaj sfide, kuqeblutë nuk kanë mundur dot që t’ia dalin ndaj këtij kundërshtari. Në total numërojnë 8 humbje dhe 5 barazime. Pra, maksimumi që kanë shijuar gjatë kësaj periudhe janë vetëm 5 pikë të marra. Nëse shohim me vëmendje historikun e përballjeve që janë luajtur në Shkodër, statistikat janë disi më premtuese. Në 6 ndeshje në total, kanë humbur 2 herë dhe 4 të tjera janë mbyllur në barazim. Ndaj, shpresat për të mos dalë duarbosh nga ky duel ekzistojnë.
“SHPAGIMI” - Vlen të saktësojmë se një sezon më parë, këto skuadra nuk kanë luajtur me njëra-tjetrën dhe bëhet fjalë pikërisht për vitin kur Vllaznia ra në Kategorinë e Parë. Kryeqytetasit fitoren e fundit e kanë marrë më 13 maj 2018, një takim që thelloi edhe më shumë krizën e shkodranëve. E megjithatë, rënia u “vulos” më vonë dhe asokohe kuqeblutë u ankuan se ndikim pati ajo humbje që Partizani pësoi kundër Kamzës (e cila shpëtoi). Nisur nga kjo, në Shkodër e shohin këtë ndeshje edhe si një shans për... “shpagim”.