Ujka: Bylisi më motivon, në Superiore lëmë gjurmë
Bylisi po e shfrytëzon në maksimum ndërprerjen e kampionatit. Në mesjavë ballshiotët luajtën testin e parë për këtë javë, ku në “Roza Haxhiu” barazuan 1-1 me Lushnjën. Mallakastriotët kanë në plan që të luajnë edhe një ndeshje miqësore me Apoloninë dhe me shumë gjasa, ndeshja do të luhet të shtunën në qytetin e Fierit, duke qenë se në stadiumin e Ballshit po kryhen disa punime rehabilituese. Drejtuesit e klubit kanë afruar shumë lojtarë të rinj, të cilët shikohen si futbollistë të perspektivës. Serxhio Ujka kërkonte më shumë hapësira dhe u largua nga Laçi i Superiores një vit më parë dhe iu bashkua Bylisit. Sezonin e shkuar me ballshiotët, ai ra në sy sidomos me eurogolin që shënoi në finalen e Kategorisë së Parë ndaj Vllaznisë në “Niko Dovana”, duke realizuar golin e tretë në triumfin 3-1 të skuadrës së teknikut Dovedan. Lezhjani 19-vjeçar hyri si zëvendësues dhe iu deshën vetëm 3 minuta për të gjetur rrugën e rrjetës. Ndërkohë, që ai po luan edhe në Superiore, ndonëse si zëvendësues, por klubi i ka dhënë hapësira si titullar edhe në ndeshjet e Kupës së Shqipërisë duke qenë se e shikon si një mesfushor me të ardhme të garantuar. Ujka, për “Panorama Sport” ka pohuar: “E falënderoj trajnerin që edhe në Superiore po më aktivizon, ndonëse konkurrenca në skuadër është e madhe. Te Bylisi ka shumë lojtarë me kualitete dhe me eksperiencë, nga të cilët mund të përfitoj dhe të perfeksionohem më shumë duke u bërë një futbollist cilësor. Kam luajtur në ndeshjet e Kupës së Shqipërisë, por edhe në Superiore, madje luajta edhe në takimin e fundit në Laç. Unë bëj pjesë te lojtarët me perspektivë të klubit, e sigurisht që kam synimet e mia për karrierën. Shkallët ngjiten gradualisht. Vjet isha në Kategorinë e Parë, firmosa në Ballsh dhe u ngjitëm në elitë si kampionë. Tashmë dua që të luaj sa më shumë këtë sezon me Bylisin dhe pse jo, të kem më shumë premisa për të ardhmen. Bylisi më motivon sa herë që futem në fushën e lojës. Këtu do qëndroj për më shumë suksese. Paraqitja ime shpresoj që t’i shërbejë skuadrës në Superiore në realizimin e synimeve. Kam besim se Bylisi do të lërë gjurmë këtë vit në Superiore”.