Ibrahimllari bën “mea culpa”: Kemi neglizhuar
27-vjeçari i formacionit verdhejeshil mungon me Orikun
Lushnja shënon rreg ullisht, por edhe pë son. Këtë sezon skuadra lushnjare luan me dy qendërmbrojtës të rinj në formacion. Beqir Ibrahimllari, 27 vjeç, vjen nga Egnatia dhe është aktivizuar në 4 ndeshje të plota, ku është ndëshkuar me 4 kartonë të verdhë dhe ka shënuar një gol vendimtar ndaj Besës, duke i dhënë tri pikët skuadrës së tij. Në krah të tij është aktivizuar në 3 ndeshje edhe 21vjeçari kavajas, Denis Brahimaj, kurse lushnjari Adriatik Basha në një ndeshje. Në këto 4 javë Lushnja ka pësuar 6 gola dhe kjo konsiderohet një shifër mjaft e lartë për një skuadër që pretendon vendin e parë në grup.
IBRAHIMLLARI – Për gazetën “Panorama Sport” ka folur qendërmbrojtësi Ibrahimllari, i cili ka pohuar se kritikat për mbrojtjen nga ana e trajnerit Ilir Gjyla janë të drejta. “Po, kemi pësuar gola më shumë për neglizhencën tonën se për meritë të kundërshtarit. Kritikat janë të drejta dhe duhet të jemi më të kujdesshëm. Po punojmë për të arritur aty ku duhet. Por janë ndeshjet e fillimit dhe ekipi do të bëhet edhe më i fortë.
Nuk duhet të mërzitemi, sepse do ta rimarrim vendin e parë. Tani ka një ndërprerje dhe do të punojmë shumë. Unë debutoj këtë sezon te Lushnja dhe ndjehem i privilegjuar që luaj me një skuadër që ka kaq peshë në kampionat. Ndjehem shumë i vlerësuar, sepse është një klub shumë korrekt nga ana financiare. Mendoj se do të përmirësohemi dhe do të eliminojmë gabimet që mbrojtja e Lushnjës të mos pësojë siç ka pësuar deri më tani. Për këtë duhet të punojmë shumë”, thekson mbrojtësi i Lushnjës, i cili ka kontribuuar edhe në sulm. “Jam shumë i kënaqur që kam kontribuuar për sulmin. Me Besën dhashë një asist në golin e parë dhe shënova golin e fitores. Ishte goli i parë me Lushnjën, që ua dedikova shokëve, stafit dhe tifozëve tanë. Megjithatë, është e trishtueshme të jetë një skuadër kaq e mirë si Lushnja në vendin e dytë. Vendi i parë është për atë që gabon më pak dhe e rëndësishme është që pësimi të na bëhet mësim. Me Orikun nuk do të jem, sepse jam i skualifikuar nga kartonët, por jam i bindur se do të rikthehemi te fitorja dhe vendi i parë”, përfundoi Ibrahimllari.