Barazim ndaj Senegalit, Brazili vijon me ecurinë negative
Tri ndeshje radhazi pa fitore, Nejmarit i prishet festa
Brazili luajti dje miqësoren e radhës. Në Singapor u përball me Sinegalin, por pavarësisht forcës së rivalit, Nejmar me shokët nuk shkuan më shumë se një barazim 1-1. Ky rezultat bën që të besuarit e Tites të regjistrojnë sfidën e tretë radhazi, ku nuk dalin dot me pikë të plota, pavarësisht se rezultati i djeshëm është krejtësisht pa vlerë. “Seleçao” zbriti në fushë me formacionin më të mirë të mundshëm dhe përveç yllit të PSG-së (në ndeshjen e 100-të në kombëtare) nuk munguan edhe emra të mëdhenj si Dani Alvesh apo Tiago Silva. Vija e parë do
t’i fuste të dridhurat çdo mbrojtjeje, por as Nejmar, e aq më pak Gabriel Zhesus nuk mundën të gjejnë rrugën e rrjetës. Në fakt, goli për brazilianët erdhi shumë shpejt, pasi në minutën e nëntë, Firmino shënoi në mënyrë spektakolare. I ndodhur në të djathtë të zonës, bomberi i Liverpulit lëshoi një silur
që pasi tronditi traversën, përfundoi pas shpinës së Gomis. Nuk munguan rastet për ekipin e Tites, me Kasemiro e Artur që tentuan gjithashtu nga distanca, por shënjestra e mesfushorëve të Realit e Barçës nuk ishte në nivelin e duhur e për pasojë 45 minutat e para u mbyllën në avantazhin e një goli për Brazilin. Pjesa e dytë nisi menjëherë vrullshëm për Senegalin me Ismaila Sarr, që pasi futet në zonë, ndalet nga Kasemiro në mënyrë të parregullt. Për arbitrin nuk ka dyshime dhe afrikanët fitojnë një penallti e cila shndërrohet në gol nga Diedu që qëndron i ftohtë përballë Ederson. Riçarlison e Everton hidhen në fushë për të korrigjuar një rezultat që do të mbetet i pandryshueshëm deri në fund, pavarësisht pesë minutave shtesë dhe pavarësisht këmbënguljes së brazilianëve që regjistrojnë një tjetër barazim në kalendarin e miqësoreve të tyre në 6 javët e fundit.