Anglia, për një biletë në Çeki
Sauthgejt sqaron kërcënimin për racizmin: Nëse do ketë fyerje, ne do lëmë fushën
Ta mbyllin sa më parë. Për futbol listët e kombëtares angleze, ndeshja në Pragë kundër Republikës Çeke është shansi jo vetëm për të provuar disa ide të reja të trajnerit Garet Sauthgejt, por edhe për të siguruar kualifikimin në finalet e Europianit. Me një fitore sot në “Sinobo Stadium”, ishullorët do të kualifikoheshin në finalet e Europianit të verës së ardhshme. Përpara nisjes drejt Pragës, Garet Sauthgejt humbi edhe shërbimet e mesfushorit të Lestërit, Xhejms Medison për shkak të një gjendjeje gripale. Por ai po planifikon që t’i japë shansin e debutimit nga minuta e parë mesfushorit të Çelsit, Mejson Maunt. Në fakt, tema kryesore e konferencës së djeshme të trajnerit të “Tre Luanëve” ishte plani i tij për tërhequr skuadrën nga fusha në rast se do të ketë rishfaqje të sjelljes raciste në kualifikuesen kundër Bullgarisë të hënën në Sofje. Stadiumi “Vasil Levski” do të jetë i mbyllur pjesërisht në këtë ndeshje për shkak të fyerjeve raciste të tifozëve vendës në kualifikuesen kundër Malit të Zi dhe Kosovës. Anglezët e vuajtën vetëm racizmin ndaj lojtarëve me ngjyrë në fitoren ndaj Malit të Zi në Podgoricë në fillim të këtyre kualifikueseve, por tani kanë ndërmend që të braktisin fushën nëse sjellje të tilla do të përsëriten. “Ka një proces në UEFA dhe ne duhet t’i qëndrojmë besnik atij procesi. Gjithçka tjetër është hipotetike, sepse ne nuk e dimë se në cilën situatë do të ndodhemi”, tha Sauthgejt. “Gjëja më e rëndësishme për mua është që të gjithë lojtarët dhe i gjithë stafi të dinë se janë të mbështetur. Duke qenë se ne vuajtëm një situatë të tillë në Malin e Zi, donim që të ishim të qartë se kjo mund të përsëritej edhe në të ardhmen. Jemi shumë të qartë për këtë. Ne duam që futbollistët të jenë të përqendruar te futbolli dhe të gjykohen për lojën. Ajo që unë duhet të bëj, është të siguroj një ambient të sigurt për ata që luajnë. Nëse do të ketë thirrje raciste, ne do të respektojmë protokollet e UEFA-s”.