“Foden do zëvendësojë Silvën, nuk e shes as për 500 mln”

Pep Guardiola ka një lojtar të “përkëdhelur” te Mançester Siti. E pranon në çdo dalje se ndihet në faj me të, sepse nuk e aktivizon sa duhet, por për atë që dikur e ka cilësuar Andres Iniestën e ri, ai ka plane të mëdha. Trajneri katalanas thotë se Fill Fodenin e pret një e ardhme e ndritur dhe se Siti nuk do ta shiste mesfushorin e talentuar as për 500 milionë euro. Pep është kritikuar shumë për aktivizimin me pikatore të talentit të akademisë, por në librin e tij të fundit “Siti i Pepit, ndërtimi i një Superskuadre”, ai premton se sezonin e ardhshëm, pas largimit të David Silvës, Foden do të jetë pasuesi natyral i spanjollit. “Ne nuk i dhamë Fodenit një kontratë të re rastësisht. Ai është i vetmi futbollist që nuk mund të shitet për asnjë rrethanë, i vetmi. As për 500 milionë euro. Fill nuk do të shkojë asgjëkund. Fill është Siti. Ne nuk do të blejmë asnjë lojtar tjetër për atë pozicion. Kur David Silva të largohet, ne e dimë me saktësi se cili do të jetë magjistari ynë i ri”, thotë Guardiola për 19-vjeçarin.

– Në libër zbulohet edhe sesi Guardiola i frymëzoi lojtarët e tij për të fituar tripletën në Angli pas eliminimit dramatik nga Totenhemi në gjysmëfinalet e Champions-it sezonin e shkuar. “Qytetarët” menduan se u kualifikuan në finale, kur Sterling shënoi në shtesë golin e përmbysjes, por pak sekonda më vonë festa ia lë vendin dëshpërimit, pasi VAR vendosi anulimin e golit. 60 orë më pas, Siti kishte një tjetër ndeshje me Totenhemin, kësaj radhe në kampionat, e cila mund të kishte pasur pasoja shkatërrimtare në garën për titull me Liverpulin. “Jam krenar për ju. E di që ndiheni si m.. dhe mendoni se nuk është e drejtë. Por pikërisht këtë do të bëjmë në këtë moment. Do të hamë këtë m... që duhet të hamë. Duhet ende të luftojmë për gjithçka na ka mbetur”.