Nga Bajerni te Gjermania, Gnabri është ylli i ri
Nga Shtutgarti tek Arsenali, Kovaç bindi Hënesin për të
Serge Gnabri është padyshim lojtari i momentit në futbollin gjerman. Katër golat e shënuar ndaj Totenhemit në Londër për sfidën e Champions-it ku bavarezët fituan me rezultatin e thellë 7-2 kanë ngjallur vëmendjen e të gjithëve. Ndërsa të mërkurën, gjermani nuk zhgënjeu as në miqësoren ndaj Argjentinës, duke shënuar një gol dhe dhënë një asist për “pancerat”, të cilët edhe pse nuk shkuan më shumë se një barazim 2-2 në Dortmund, bënë një perfomancë të mirë. Por historia e 24-vjeçarit nuk është një shëtitje në park, shumë refuzime, dështime dhe pak gëzime me klubet ku ka qenë në provë. Përpara se të shpërthente në sezonin e kaluar me Bajernin. Niko Kovaç këmbënguli për të sjellë nga huazimi me Hofenhaimin sulmuesin e krahut të djathtë. Karl Hainc Rumenige dhe Uli Hënes, edhe pse skeptikë në fillim, ia plotësuan dëshirën kroatit. Ky i fundit e përfshiu menjëherë në formacionin e parë, duke ulur në stol një lojtar klasi si Arjen Roben. Por në fushë, Gnabri shënonte dhe shërbente për shokët duke ndihmuar skuadrën të arrinte e para në finish dhe për të fituar kampionatin. Kupa e Gjermanisë erdhi gjithashtu në Mynih dhe kjo falë një superparaqitje të 24-vjeçarit ndaj Hertës në gjysmëfinale.
KARRIERA - Nga 2005 deri në 2011, Gnabri luan për të rinjtë e Shtutgartit, pasi kishte ardhur nga amatorët e Didcinger dhe Visbah. Bajerni e kërkoi që atëherë për të luajtur me skuadrën e dytë, por i ati dhe trajneri nuk e lejuan, duke këmbëngulur që ai të shkonte dikur tjetër. Dhe kështu ndodhi, Serge shkon në Londër ku në fillim luajti për U 18 e Arsenalit dhe më pas me skuadrën e parë. Plot 4 sezone qëndroi ai në skuadrën e “topçinjve”, duke kaluar më pas në formën e huazimit te skuadra e Uest Bromuiç ku luajti vetëm 12 minuta në 12 muaj. Arsen Venger mendoi ta rikthente sërish në Londër edhe pse Gnabrit, atëherë 21-vjeç, i kishte ardhur në majë të hundës Premier Liga dhe kërkonte të rikthehej në Gjermani. Verder Bremen i pagoi 5 milionë euro “topçinjve”, të cilët e lanë të lirë lojtarin. Me bardhjeshilët, ai filloi të tregonte se sa vlente në të vërtet, duke shënuar 11 gola në 27 ndeshje. Pas një sezoni me Verderin, Bajerni vendos të paguajë 15 milionë euro për lojtarin i cili nuk qëndroi gjatë dhe shkoi të luante me Hofenhaimin në formën e huazimit, pasi në Mynih, Roben dhe Riberi ishin të pazëvendësueshëm. Me bardhebultë, Gnabri shënoi në sezonin e parë 10 gola dhe dha 7 asiste duke bindur kampionët në fuqi ta rikthenin në sezonin e kaluar në Mynih. Serge nuk zhgënjeu dhe arriti të ndihmonte skuadrën të fitonte kampionatin dhe kupën e Gjermanisë.
Me kombëtaren e Gjermanisë, ai nisi karrierën e tij nga moshat, duke shënuar 20 gola në 45 ndeshje për ta. Me ekipin e parë, Gnabri arriti, me golin e shënuar ndaj Argjentinës, të shkonte në kotën e 10 golave në 11 ndeshje, duke lënë pas edhe ish-sulmuesin e njohur, Miroslav Klose.