Rumenige: Interi për titull, Perisiçin mund ta mbajmë

Ish-lojtari i zikaltërve shprehet optimist për ecurinë e skuadrës së Antonio Kontes

Interi po kalon një formë të mirë në këtë fillim kampionati, teksa në 7 ndeshje, kanë marrë 6 fitore dhe 1 humbje, pikërisht atë në fundjavë kundër Juventusit. Për formën e zikaltërve ka folur edhe një ish-lojtar zikaltër, sot në rolin e Drejtorit të Përgjithshëm te Bajerni i Munihut: Karl-Hainc Rumenige, i cili gjatë një interviste për mediat italiane, në kuadër të një eventi të "Gazzetta dello Sport", të organizuar në Trento, është shprehur me optimizëm lidhur me ecurinë e skuadrës së Antonio Kontes: "Interin e shoh shumë mirë, janë paraqitur pozitivisht në ndeshjet e para, përveç sfidës së humbur kundër Juventusit. Mund të fitojnë kampionatin këtë vit. Konte po bën një punë shumë të mirë aty, gjëja më e rëndësishme është se zikaltrit kanë marrë një trajner me cilësi si ai. Kundër Barcelonës, pashë një ndeshje shumë të mirë të Interit, meritonin edhe golin e dytë. Barça e fitoi me fat atë ndeshje. Interi është një ekip i rindërtuar, duhet pak durim. Lukaku? I kërkohet të shënojë shumë gola, shpresoj t'i bëjë", theksoi 64-vjeçari.

RIBERI DHE PERISIÇ - Gjithashtu, Rumenige foli edhe për kalimin e Frenk Riberisë te Fiorentina, pasi francezi i dha lamtumirën klubit bavarez pikërisht këtë verë: "Montela bëri një veprim të zgjuar që e mori atë te Fiorentina. Kundër Milanit realizoi një gol të bukur. Gjithmonë ka qenë një lojtar shumë i mirë, jo rastësisht ai luajti për 12 vite me Bajernin. Na habiti kur u transferua në Itali, pasi të gjithë prisnim që ai të kalonte në Arabinë

Saudite ose Kinë. Në fund është prekur edhe tema e huazimit të Ivan Perisiçit te Bajerni: "Nuk e përjashtoj shlyerjen, pasi ka zhvilluar një nisje pozitive të sezonit. Kemi një akord me Interin për të biseduar sërish në fund të sezonit, do vlerësojmë gjithçka edhe me lojtarin.