REJA, NA QERAS ME NJË FITORE!
Turqit provokojnë duke hequr flamujt kuqezi, por zmbrapsen për tifozët Tre lojtarë me probleme, Roshi në vend të Hysajt 6 mijë euro premio për kokë, Memushaj: E pranoj edhe të kuqin
Trajneri Edi Reja është i vetëdijshëm se çfarë e pret sot. Teksa gjatë konferencës për shtyp përmend vetëm yjet e sulmit në kampin kundërshtar, në tokën turke i thur elozhe homologut Gynesh, por nuk e ul aspak stekën e kërkesave. “Dua një ekip që lufton për 90 minuta. Na duhet ndeshja perfekte pasi në të kundërt, është e sigurt që dalim të humbur nga këtu”, tha ndër të tjera italiani përpara gazetarëve. Italiani kujtoi edhe një herë se sot në orën 20:45 do të jetë një ndeshje krejt ndryshe nga ajo që u luajt në Shkodër për sfidën hapëse të kualifikueseve. Ai e përjashtoi mundësinë për aktivizimin e ndonjë debutuesi nga minuta e parë, duke lënë të kuptohet se mbrojtësi Marash Kumbulla, i cili po shkëlqen te Verona, do të qëndrojë në stol.
Si e keni përgatitur këtë ndeshje dhe si është rivali që do të keni?
Grupi po funksionon mirë. Po punojmë mirë në të gjitha aspektet. Kemi konsideratë për Turqinë, sepse ka lojtarë si Burak Jilmaz, Çalhanoglu dhe Tosun. Po përmend sulmuesit sepse dalin më shpesh para portës. Janë lojtarë që i njoh, pasi unë jam italian dhe e ndjek kampionatin italian. Neve na duhet të jemi në kondicionin më të mirë të mundshëm. Duhet të shprehim potencialin në fushën e lojës, ndryshe do ta humbim këtë sfidë. Duhet të bëjmë një përfaqësim sa më dinjitoz për këtë ekip sepse e meriton.
Sa do të ndikojnë mungesat dhe si është gjendja e skuadrës?
E dimë mirë rëndësinë që kishte Hysaj, por cilido që të luajë, do të bëjë mirë. Ky është një test i rëndësishëm për ne sepse përmes kësaj ndeshjeje mund të bëjmë vlerësime, nëse po përmirësohemi në aspektin individual dhe kolektiv. Do të na japë përgjigje për çfarë kemi bërë, uroj pozitive që ka ndodhur rritja, duhet të marrim në konsideratë se kemi ndryshuar gjëra, kanë ardhur lojtarë të rinj edhe muajt e kaluar. Pres përmirësime të tjera që nga ndeshja me Islandën dhe nëse do të jenë, do të thotë që kemi marrë rrugën e duhur.
Çfarë ka ndryshuar dhe cilat gabime nuk do përsëriten nga Shkodra?
Nuk kam parë vetëm atë ndeshje, kam parë Turqinë edhe në ndeshje të tjera, kur ka luajtur në shtëpi. Si atë me Francën që e ka mundur, gjë e cila nuk është aspak e lehtë. Ka bërë mirë edhe në Shkodër duke fituar 2-0. Qartësisht që kjo është një ndeshje që duhet përballuar me vendosmëri, duhet të jemi të aftë faktikisht. Turqia është një skuadër e cila është e fortë fizikisht dhe teknikisht, kanë bërë gol me goditje standarde e janë të rrezikshëm. Të gjitha këta elementë kërkojnë që nesër (sot) në darkë të jemi të vëmendshëm. Nëse do të
kemi vëmendjen e kërkuar, do të jetë më e lehtë të bëjmë një paraqitje të mirë. Të bëjmë edhe rezultat. Ajo që më intereson në mënyrë të veçantë është që të shoh përmirësimet në krahasim me ndeshjen e fundit. Pres një paraqitje të mirë gjatë 90 minutave, se nuk duhet të ulim asnjëherë vëmendjen. Në të kundërt, Turqia bëhet e rrezikshme sepse ka lojtarë të aftë.
A do të ketë debutues në formacion?
Jo, debutues jo. Në pankinë do të ketë 2 lojtarë që po presin shansin e tyre dhe mund të futen në fushë si zëvendësues.
Intervista për “RTSH” Pas fjalës në konferencë, trajneri Reja është ndalur edhe përpara mikrofonit të një prej transmetuesve zyrtarë të ndeshjes. Në një prononcim për “RTSH”, tekniku i Kombëtares foli në lidhje me problemet në këtë përballje si dhe raportet me presidentin Duka.
Çfarë problemesh kanë lojtarët përpara këtij takimi?
Probleme ka për Roshin, i cili ka shqetësime në kavilje, por edhe për Qosen. Memushaj ka shqetësime muskulore. Më vjen keq shumë edhe për Hysajn dhe dëmtimin që pësoi
në kampionat.
Cilat janë raportet tuaja me presidentin e FSHF-së?
Presidenti do të dijë gjithçka që ndodh gjatë javës dhe se si janë lojtarët. Folëm gjatë gjithë rrugës për të ardhmen. Ne po punojmë që të mundohemi të çojmë Shqipërinë dhe federatën përpara, të përmirësohemi gjithnjë e më shumë. Në këtë pikëpamje jemi në sintoni. Shqipëria po rritet, në struktura e bindje se skuadra duhet të ecë para. Urojmë që ndeshja me Turqinë të na japë më shumë siguri se duke përballuar një skuadër me këtë nivel, nëse dalim me një paraqitje
të mirë, do të kemi miratimin e njerëzve dhe publikut. Kjo do të ishte një rritje shtesë jo vetëm e federatës, por edhe e skuadrës.
Keni diskutuar për çështjen e rinovimit?
Jo, nuk kemi folur për rinovimin, por ajo që na intereson është të vazhdojmë në këtë rrugë, të shohim skuadrën të rritet. Pastaj kemi ndeshjet që do të luajmë në Tiranë, inaugurimin e stadiumit dhe objektivi ynë është të shkojmë në atë ndeshje duke qenë në garë për kualifikimin. Kur të mbrojnë kualifikueset, do të ulemi të diskutojmë për të ardhmen.