Statistikat, Partizani makth për Vllazninë
Fati i mirë i portierit, ngrihet pa u mbushur një javë
Aldo Teqja u përfshi në një incident të rëndë pas barazimit 1-1 që Partizani mori të shtunën e 5 tetorit ndaj Teutës. Pa u mbushur një orë nga përfundimi i këtij takimi, u raportua se portieri i dytë i Partizanit ka pësuar një aksident duke rënë nga ballkoni i shtëpisë së tij në katin e gjashtë. Njoftimi paraprak i Policisë së Tiranës bëri që të turbullohen motivet e incidentit, pasi më vonë nga familjarët është raportuar si ngjarje aksidentale. “Gardiani” i të kuqve ka qenë me fat, pasi nisur nga rrethanat, ngjarja ka qenë e frikshme, por Teqja ka arritur t’ia hedhë në mënyrën më të lehtë të mundshme. Pa u mbushur as një javë raportohet se rikuperimi po ndodh në kohë rekord. Gjendja shëndetësore e Aldo Teqjes është drejt përmirësimit dhe shumë shpejt portieri i Partizanit pritet të lërë spitalin. Diçka të tillë e komunikoi vetë klubi i kuq, nëpërmjet një njoftimi në faqen zyrtare në “Facebook”. Partizani ka postuar një foto ku shfaqen drejtori i përgjithshëm Olsi Rama, trajneri Franko Lerda dhe pjesëtarë të tjerë të stafit, gjatë vizitës që i kanë bërë lojtarit në spital. Madje në foto Teqja duket në pozicion i ulur në krevat dhe jo i shtrirë. Delegacioni i kuq i kishte dhuruar edhe një bluzë të kuqe me mbishkrimin “Partizani Kampion” portierit Teqja.
Njoftimi i Partizanit- “Klubi njofton se gjendja shëndetësore e portierit Aldo Teqja është drejt përmirësimit të plotë. Shumë shpejt pjesëtari i skuadrës pritet të lërë ambientet e Spitalit të Traumës. Klubi dhe tifozët vazhdojnë t’i qëndrojnë pranë Aldos përgjatë gjithë periudhës së qëndrimit të tij në ambientet e spitalit”. Ky ishte njoftimi që Partizani bëri dje pas vizitës së drejtuesve.