Zgjedhjet te Bajerni, Gnabri del kundër Kovaçit

"Askush nuk është i kënaqur kur s'luan, me Estoninë vetëm për 3 pikë"

Serge Gnabri ishte për ballë gazetarëve për të folur në prag të ndeshjes ndaj Estonisë për eliminatoret e futbollit "EURO 2020". Anësori i djathtë i skuadrës së Bajernit dhe kombëtares gjermane preku disa tema interesante ku përveç "pancerave" dha një mendim personal edhe për çështjen "Myler" që ka përfshirë ambientin bavarez këtë javë.

Jeni dakord me reagimin e Tomas Mylerit?

Nëse një lojtar nuk luan, atëherë nuk është i kënaqur, kjo është e kuptueshme. Ky reagim është normal sipas mendimit tim. Tomas nuk po kalon një moment të mirë dhe për këtë më vjen keq.

Mendoni si ai do të largohet?

Nuk e di, duhet të pyesni lojtarin. Unë ndodhem këtu me ju në Dortmund me kombëtaren. Mund të them se do të ishte një gabim i madh nëse një lojtar i tillë do të lihej të largohej. Tomas dhe Bajerni janë një. Ai dhe trajneri duhet të gjejnë gjuhën e përbashkët.

Të rikthehemi te forma juaj, çfarë po ndodh me Sergen?

Po përjetoj një moment shumë të mirë. Kjo nuk është rastësi, por puna e vazhdueshme që kam bërë në stërvitje. Ambienti ku kam punuar më ka ndihmuar shumë. Po jap maksimumin tim dhe shpresoj që në fund të shpërblehem ashtu si skuadra.

Përballë do të keni Estoninë, mund të jetë një kundërshtar i vështirë për ju?

Ne e dimë që nuk duhet të nënvlerësojmë asnjë kundërshtar në grup. Ata do të luajnë përballë publikut të tyre, i cili pret një rezultat të mirë nga skuadra e tyre. Do të jetë një sfidë delikate përballë një

kundërshtari që luan shumë i tërhequr prapa. Duhet të shënojmë sa më shpejt për t'ia bërë sa më të lehtë vetes.

Trajneri Lëv ka deklaruar se vendi juaj në formacion është i sigurt, jeni dakord?

Nuk e di. Ajo që mund të them është se duhet të punoj

shumë për të arritur në majë. Më duhet të justifikoj besimin e tij sa herë që zbres në fushën e lojës. Jam i sigurt se nëse nuk bëj paraqitje të mira në tri ndeshje radhazi, atëherë një lojtar tjetër do të zërë vendin tim. Nisur nga kjo, asnjë lojtar nuk e ka vendin e titullarit të sigurt.