Formacioni ideal në Serinë A, Kumbulla mes më të mirëve
Shqiptari mes pesë të rinjve më premtues, përkrah Sensit
Shqipëria ka në për bërje një nga shpër thimet e momentit në Serinë A. Nuk është një bomber, por mes shumë shqiptarësh që po tregojnë formë të mirë, Marash Kumbulla ka bindur gjithkënd që po luan si veteran. Po, edhe statistikat zyrtare e tregojnë këtë. Nuk bëhet fjalë për shënimet e ndonjë portali pranë skuadrës së Veronës, për ta sponsorizuar 19-vjeçarin në tregun e merkatos, por nga vetë OPTA, burimi i të dhënave statistikore më të besueshme në Itali dhe jo vetëm. Kjo e fundit ka përzgjedhur formacionin më të mirë pas shtatë javëve të para të zhvilluara në Serinë A italiane.
Marash Kumbulla po kalon një formë shumë të mirë në këtë fillim sezoni, teksa i ka surprizuar të gjithë me paraqitjet e tij. Mbrojtësi shqiptar, edhe pse është në moshën 19-vjeçare, në fushën e lojës duket si një futbollist me përvojë të madhe. Madje, në ndeshjen e fundit me ekipin e tij, Kumbulla gjeti edhe rrugën e rrjetës, teksa shënoi kundër Sampdorias në minutën e 9-të. Realizim i cili e bëri atje lojtarin më të ri që ka shënuar në këtë edicion në pesë kampionatet elitare në botë. Këto paraqitje të shkëlqyera të futbollistit shqiptar nuk kanë kaluar pa u vënë re, teksa së fundmi ai është zgjedhur në formacionin më të mirë të shtatë javëve të para në Serinë A. Formacion i cili është zgjedhur nga OPTA, në bazë të paraqitjeve të lojtarëve dhe sa të rëndësishëm kanë qenë ata për skuadrat e tyre.
Në bazë të statistikave të deritanishme, shqiptari është zgjedhur në mbrojtjen me 3 përkrah mbrojtësit të Interit, Stefan De Vraj, dhe atij të Lacios, Açerbi. Në formacionin 3-4-1-2, bëjnë pjesë edhe emra si Olsen në portë, në mesfushë Kajehon, Pjaniç, Sensi dhe Kolarov, ndërsa në sulm ndodhet Luis Alberto pas dyshes Zapata, Imobile.
Krahas kësaj përzgjedhjeje, në futbollin italian, media të ndryshme kanë përzgjedhur edhe pesë futbollistët më të rinj që kanë shpërthyer në këtë nisje të kampionatit italian. Ndër ata me më shumë peshë dhe që ka rritur së tepërmi pritshmëritë ndaj tij, është Sensi i Interit. Mesfushori 24-vjeçar është bërë i pazëvendësueshëm në formacionin e Kontes dhe shembulli për këtë u pa ndaj Juventusit, teksa pas zëvendësimit të tij, zikaltrit vuajtën së tepërmi në përballjen me "Zonjën e Vjetër". Mes të rinjve më premtues është edhe 19vjeçari i Kombëtares shqiptare, Marash Kumbulla. Mbrojtësi i Veronës ka treguar saktësi, forcë në duelet ajrore, vendosmëri në ndërhyrje, edhe pse përballë ka pasur ekipe si Milani apo Juventusi. Qendërmbrojtësi një sezon më parë ka luajtur vetëm 16 minuta në Serinë B, por në këtë start edicioni është bërë i pazëvendësueshëm te Verona, me të cilën në ndeshjen e fundit ndaj Sampdorias shënoi golin e tij të parë në elitën e futbollit italian.