Ka deficit pikësh, por Lani e sheh Besëlidhjen në elitë
Besëlidhja ishte vlerësuar në letër si pretendente kryesore për Superioren para nisjes së kampionatit, por ai hap fals në fushën e tyre me Egnatian i ka befasuar disi lezhjanët, të cilët ende sot nuk e besojnë si kanë gabuar. Për të ruajtur formën sportive, pasi kampionati është ndërprerë, Besëlidhja luan sot një miqësore me Kukësin në periferi të Tiranës. Trajneri Elvis Plori kërkon ta mbajë skuadrën nën kontroll të rreptë fizik, ndaj dhe ka planifikuar këtë miqësore ndaj një prej skuadrave më të forta të Superiores. Besëlidhja renditet në vend të dytë, një pikë larg kreut që mbahet nga Korabi, por lezhjanët duan vendin e parë sa më parë, pse jo që në ndeshjen me Tërbunin në Pukë. Zëvendëstrajneri Gledis Lani shprehet optimist, teksa në një prononcim për "Panorama Sport" deklaron: "Në këto 4 javë të para të kampionatit kemi grumbulluar 8 pikë dhe nuk jemi të kënaqur. Dy pikë i kemi lënë kot në shtëpi ndaj Egnatias, gjithsesi kështu është futbolli, prandaj ka edhe anën emocionale të tij. Jemi në kulmin e përgatitjeve për javën e pestë që do ta luajmë në Pukë ndaj Tërbunit, ku shpresojmë shumë të marrim pikë. Kemi planifikuar një miqësore ndaj Kukësit në Tiranë, ku do ta testojmë ekipin në ngarkesë të plotë, madje përballë një kundërshtari shumë të fortë. Besëlidhja e këtij sezoni shpresojmë shumë se do ta realizojë ëndrrën e tifozërisë lezhjanë për kthimin në Superiore, ku ka një pjesë të madhe të historisë së saj. Të gjithë jemi të angazhuar maksimalisht në detyrat tona që të jemi fitues ndaj të gjithë ekipeve dhe në çdo fushë ku do të luajmë, jo vetëm në Pukë me Tërbunin". Preng GJIKOLA