Rekord dhe perfeksion, kualifikohet Italia

Zhorzhinjo dhe Bernardeski u dhurojnë biletën të kaltërve për në "Europianin 2020"

Misioni u përm bush! Italia pret biletën për "Europianin 2020", pas fitores 20 kundër Greqisë, falë një penalltie të Zhorzhinjos dhe një të majte nga jashtë zone të Bernardeskit. Dhe kaq mjafton që trajneri Roberto Mançini të mund të festojë, sepse asnjëherë më parë, "axurrët" që dje luajtën me një fanellë jeshile, nuk kishin arritur që të kualifikoheshin 3 ndeshje përpara fundit. Për më shumë, duke bashkuar edhe humbjen e Finlandës në Bosnjë dhe barazimin e Armenisë, katër herë kampionët e botës blinduan matematikisht edhe vendin e parë në grup. Jo keq për një përfaqësuese, e cila 23 muaj më parë humbte "play off"-in me Suedinë dhe mbetej jashtë Botërorit "Rusi 2018". Gjithsesi, plani i ringritjes funksionoi dhe dje erdhi konfirmimi i parë, pasi tashmë kjo Itali vërtet është rikthyer e frikshme.

BLLOKIM EMOCIONAL

Përpara 56 mijë tifozëve, Italia e dinte se nuk mund të gabonte, pasi ishte një natë shumë speciale, ishte një natë që brenda vetes përmblidhte më shumë sesa thjesht tri pikët. Italisë i nevojitej të rikthehej të nderonte emrin e saj të madh, por të gjitha këto të mbledhura së bashku ndoshta turbulluan emocionalisht jo pak shumë prej "vogëlushëve" të Roberto Mançinit. Trajneri hoqi dorë në momentin e fundit nga Bernardeski dhe zgjodhi Barelën në mesfushë, pasi kishte paralajmëruar për mundësinë për të luajtur me 4 sulmues, edhe pse juventini do të luante më i spostuar. Dhe bëri mirë, sepse "axurrët" e nisin të frikësuar, aq sa në minutën e 12-të nevojitet një pritje madhështore e Donarumës për të shmangur disavantazhin, ndonëse menjëherë pas saj provojnë të reagojnë me Insinjen (dy herë) dhe me Barelën, ndërsa humbin edhe Kiezën për dëmtim muskulor.

HISTORIKE

Gjithsesi, pushimi dhe ulërimat e Mançinit në dhomat e zhveshjes duket se u bëjnë mirë italianëve, sepse e nisin pjesë e dytë me hapin e duhur. Nëse Insinje tregon sërish se nuk e ka çentruar shënjestrën, zgjidhja e ndeshjes do të vijë në të 62-ën, pak sekonda pasi Limnios kishte rrezikuar për grekët duke dërguar topin në rrjetën e jashtme: Insinje dhe Verrati shkëmbejnë dy pasime të shpejta dhe goditja e napolitanit ndalet me dorë nga Buhalakis. Penallti e pastër, të cilën Zhorzhinjo e dërgon saktë në rrjetë dhe kaq mjafton

që grekët të dorëzohen. Madje, në të 78-ën Bernardeski i djeg edhe me golin e dytë nga jashtë zone dhe festa mund të fillojë, sepse Italia jo vetëm konfirmohet perfekte me 7 fitore në 7 ndeshje, por siguron kualifikimin dhe vendin e parë në grup.