Humbja në frymën e fundit, ja prapaskenat me Rejën në tunel
Priten ndryshime në Moldavi, ka vend për tre debutues
Një humbje si ajo ndaj Turqisë djeg shumë. Jo vetëm për minutën në të cilën u pësua goli. Jo vetëm për faktin që na nxjerr thuajse zyrtarisht jashtë çdo mundësie për të synuar "Euro 2020". Por, mbi të gjitha, për vetë mënyrën e mirë të lojës, me rastet e shumta për shënim, të cilat na u kthyen si bumerang dhe na sollën disfatën. Gjithkush u dëshpërua. Çdo sportdashës. Si ata 2500 shqiptarë nga anembanë Europës që e ndoqën Shqipërinë në Stamboll, stafi, lojtarët... gjithkush. Ama diferencën pas ndeshjes e ka bërë pikërisht trajneri. Edi Reja ka reaguar në mënyrën më të... papritur.
PRAPASKENA
Në dhomat e zhveshjes së Kombëtares, pas ndeshjes së të premtes ka mbizotëruar qetësia. "Panorama Sport" nga burime pranë stafit të kuqezinjve ka mësuar se atmosfera në ekip ka qenë krejt normale. Sigurisht, të gjithë të mërzitur. Mes tyre edhe pak lot nëpër sy, si Thomas Strakosha. Trajneri Edi Reja ka qenë krejtësisht i qetë. Sigurisht, burimet tregojnë se edhe italiani ka qenë shumë i mërzitur. Por, sapo në dhomë janë futur të gjithë, lojtarët dhe
stafi. Ai ka ngritur zërin. "Mos u mërzisni. Nuk dua t'ju shoh kështu. Meritonim të fitonim sot", ka qenë thirrja e trajnerit drejtuar ekipit, lojtarëve dhe stafit që kanë qenë brenda. Për një trajner që ka kaluar të 100 pankinat në një kampionat si ai në Itali, sigurisht që eksperienca
i ka dhënë mundësinë të pësojë edhe disfata të tilla. Por, ajo që është më e rëndësishmja, italiani ka gjetur mënyrën për të mos i rënduar më shumë futbollistët. Përkundrazi. Të gjejë fjalët që sadopak t'ua largojë pikëllimin pas një humbjeje të tillë.
FORMACIONI
Nesër Shqipëria do të zbresë prapë në fushë. Transferta e radhës ndaj Moldavisë pritet të gjejë një skuadër me jo shumë objektiva realë për të luajtur, por për trajnerin rrugëtimi vazhdon dhe për të do të ketë ende shanse për të testuar grupin, për të shtuar eksperiencën e lojtarëve me skemat dhe mënyrën e lojës dhe për shumëçka tjetër. Në këtë përballje, pritet që të ketë ndryshime të shumta. Nuk përjashtohet që të bëhet rokada edhe në portë, për t'i dhënë minuta edhe Etrit Berishës. Jo për ndëshkim ndaj Strakoshës, sesa për vlerësim edhe ndaj portierit të SPAL-it, i cili ka bërë vërtet mjaft mirë në Serinë A deri më tani. Përpara mund të ketë vend për debutuesin Marash Kumbulla, djaloshin 19vjeçar që ka bërë paraqitje të shkëlqyera me Veronën në Serinë A. Gjimshiti dhe Veseli mund të gjejë sërish vetën në fushën e lojës, për të mos e bërë "rokadë" totale. Përpara në mesfushë, Ramadani dhe Abrashi mund të kenë përkrah Kristi Qosen. Djaloshi i Ruzemberok, mund të testohet me fanellën kuqezi, pas disa grumbullimeve dhe formës së mirë që ka treguar me skuadrën e tij. Nga krahët, Odise Roshi dhe Hysen Memolla mund të jenë respektivisht djathtas dhe majtas. Të dy jo vetëm në mbështetje të prapavijës, por mbi të gjitha përkrah dyshes Bekim Balaj dhe Taulant Seferi. Për këtë të fundit, mund të ketë vend për të debutuar me kuqezinjtë.