Serbët i tërbon tërbon flamuri shqiptar, Baloteli ndërpret ndërpret ndeshjen
Pushtimi i fushës, Baloteli vendosi që mos të luhej më
Incident gjatë miqësores Bresha-Vojvodina, loja u ndërpre pas pushtimit të fushës nga tifozët serbë
Flamuri shqiptar vazhdon të tërbojë serbët, jo vetëm në tokën e tyre, por edhe jashtë kufijve. Madje, dje ndodhi një rast i përsëritur në Itali. Me rastin e miqësores së Breshas kundër Vojvodinës u vu në skenë një spektakël i shëmtuar, i turpshëm, siç janë mësuar që të bëjnë shpesh serbët. Dy ndërprerje të ndeshjes dhe një pushtim fushe nga ana e tifozëve udhëtues, të cilët detyruan që edhe miqësorja me skuadrën e Emanuele Ndojit dhe Mario Balotelit të mbyllej përpara kohe. Fatkeqësisht, pasditen e djeshme ishte një tjetër epilog i shëmtuar, i hidhur, i cili shkatërroi totalisht një ndeshje, e cila kishte nisur në mënyrën më të mirë të mundshme. Në zbritjen në fushë të të dyja skuadrave, si Bresha, ashtu sikurse edhe Vojvodina kishin veshur një fanellë të bardhë, e cila i dedikohej trajnerit serb të skuadrës së Bolonjës, Mihajloviçit, në të cilën shkruhej: "Forca Sinisha".
DY NDËRPRERJE
Që në fraksionin e parë të lojës, serbët u panë shumë nervozë, teksa në minutën e 31-të ndodhi ndërprerja e parë e lojës. Trajneri i miqve, Nenad Lalatoviç, u përjashtua më karton të kuq si rrjedhojë e toneve të ashpra, madje kërcënuese, të përdoruara ndaj gjyqtarit të ndeshjes. Madje, tekniku i Vojvodinës jo vetëm që nuk pranoi të linte stolin, por në të njëjtën kohë detyroi futbollistët e tij që të braktisnin fushën e lojës dhe të zbrisnin në dhomat e zhveshjes. Pas diçkaje më shumë se 15 minuta, Vojvodina vendosi që të rikthehej në tapetin e gjelbër, si rrjedhojë e ndërhyrjes së presidentit të klubit, Vojislav Gajiç. Gjithsesi, kjo ndeshje rinisi, por për t'u ndërprerë përfundimisht në minutën e shtatë të pjesës së dytë. Arsyeja është se në anën tjetër, jashtë kangjellave të kompleksit ku zhvillohej miqësorja, papritur valëvitet një flamur shqiptar, i cili tërbon tifozët serbë që kishin udhëtuar për të ndjekur duelin me Breshan. Ultrasit e Vojvodinës e marrin këtë si një gjest provokues dhe menjëherë vrapojnë për të pushtuar fushën, madje shkuan në kërkim të personit me flamurin shqiptar në duar, por ndërhyrja e karabinierisë dhe e skuadrës "DIGOS" bëri që përplasja të shmangej, ndonëse ndeshja, e cila deri në atë moment shihte Breshan në avantazh 2-1 (gola të Donarumës dhe Bisolit), nuk rinisi më. Madje, në fund të saj pati edhe pak tension me Mario Balotelin, i cili ishte ai që vuri veton që takimi të mos riniste më, pasi ai nuk pranonte të zbriste më në fushë pas mësymjes së serbëve. Ky vendim i sulmuesit italian nervozoi edhe më shumë jo vetëm tifozët, por edhe futbollistët e Vojvodinës.