Alcani, një lezhjan për të “shpëtuar” Burrelin
Drejtuesit e klubit matjan kanë prezantuar dje trajnerin e ri, i treti për këtë sezon
Alert Alcani është trajneri i ri i Burrelit. Ish-futbollisti lezhjan i Besëlidhjes, Partizanit, Vllaznisë etj., është prezantuar dje para ekipit të ri. Ai është i treti trajner për këtë skuadër gjatë këtij sezoni, ku përgatitjet nisën me Vladimir Gjonin, më pas ishte elbasanasi Gentian Stojku që e drejtoi ekipin për 4 javë dhe tani është radha e Alcanit. Matjanët kanë qëndruar një javë pa trajner, pas largimit të Stojkut, sepse drejtuesit e klubit nuk donin të merrnin një vendim të nxituar. Pasi panë disa alternativa, ata vendosën për Alcanin. Trajneri lezhjan është një emër i njohur në futbollin shqiptar, ku përveçse ka luajtur me disa skuadra, ai ka drejtuar si trajner Shënkollin dhe Kastriotin. Pas prezantimit, trajneri i ri i matjanëve ka pranuar se ka marrë përsipër një detyrë të vështirë, por vendimin e ka marrë me besimin se do ta ndryshojë atë. "Jam i vetëdijshëm që e kam marrë përsipër drejtimin e Burrelit ndoshta jo në një moment të mirë të tij, por me bindjen se do të bëjmë më të mirën për të. Duke pasur besim te mbështetja e klubit dhe drejtuesve të tjerë më lart, them se bashkërisht do të bëjmë një punë të shkëlqyer. Dua nga secili prej jush angazhim maksimal me përgjegjësinë më të madhe. Këtu jemi për Burrelin dhe kjo do të jetë primare për ne. Seriozitet në maksimum në stërvitje dhe në ndeshjet zyrtare. Nuk do të pranoj asnjë ndërhyrje nga askush që nuk i takon. Në lojë do të futet kush ta meritojë dhe jo ata që nuk meritojnë ndoshta as të jenë pjesë e skuadrës", tha trajneri Alcani para grupit të futbollistëve për të vazhduar më pas me seancën e parë stërvitore. Administratori i klubit Burreli, Bajram Ballabani, tha para futbollistëve se tashmë përgjegjësia do të jetë e tyre dhe e trajnerit të ri. Ballabani kërkoi impenjim maksimal nga stafi dhe lojtarët për të arritur rezultatet e kërkuara. Matjanët kanë vetëm 3 pikë në tabelën e renditjes pas 4 javësh kampionat, ku kanë regjistruar 3 humbje dhe 1 fitore, atë ndaj Dinamos. Matjanët do të presin këtë të shtunë në shtëpi ekipin e Korabit, që kryeson renditjen. Dritan Kurti