Reina: Nisja e dobët s'na i fshin synimet
Pepe Reina ka qenë i pranishëm në "Gardaland", një park lojërash i hapur enkas dje për fëmijët në nevojë. Pas eventit në fjalë, portieri i Milanit ka folur për rrjetin "Sky" duke komentuar momentin e skuadrës, ndryshimet pas ardhjes së trajnerit të ri dhe objektivat sezonalë të "Djallit", të cilët, me sa duket, kriza e këtij fillimi sezoni i ka cenuar.
Një fillim sezoni si ky nuk e kishit parashikuar apo jo?
Absolutisht jo. Ka qenë veçanërisht i vështirë, por sot këtu kam ardhur për t'u dhuruar ndonjë momente këtyre fëmijëve e jo më kot kam marrë edhe familjen me vete. Dua të kaloj një ditë të qetë, e cila me siguri do të më ndihmojë të përballoj më mirë një pjesë të re të këtij sezoni. Jam i bindur që gjithçka do të nisë të ecë pozitivisht për Milanin.
Çfarë mund ta ndihmojë skuadrën në këto momente?
Nuk ka receta të veçanta, por mendoj se optimizmi dhe qetësia mund të jenë çelësi i kthesës. Sigurisht nevojitet edhe punë, por tani kemi një trajner të ri e na duhet të kuptojmë sa më shpejt idetë e tij, në mënyrë që të jemi sa më të gatshëm për sfidat e radhës.
Cili ka qenë impakti i Piolit me skuadrën?
Me siguri është një personash i botës së futbollit dhe ka shumë përvojë në kampionatin italian. Ai e njeh futbollin në 360 gradë dhe së bashku me të kemi të gjithë dëshirë ta marrim veten e të shohim përpara për një të ardhme më pozitive.
Si mund të dalë Milani nga ky moment jo fort i mirë?
Është e kotë të justifikohemi. Deri më sot nuk kemi respektuar asnjë pritshmëri, ndaj uroj që të përmirësohemi. Duhet t'i kthejmë lumturinë tifozërisë dhe vetes. Unë jam optimist. I tillë kam qenë gjithmonë, edhe sepse jeta u përket njerëzve optimistë.
A i kanë ndryshuar këto ndeshje objektivat e klubit?
Asgjë nuk ka ndryshuar, sepse kanë kaluar vetëm disa ndeshje. Objektivi ynë duhet të jetë ndeshja e radhës e kështu duhet të jetë çdo javë. Më pas, në maj, do t'i bëjmë llogaritë tona. Jemi një ekip në rritje e duam të rritemi e të përmirësohemi në çdo ndeshje.