Barça ul çmimin e Kutinjos, Bajerni gati ta blejë
Gjermanët dëshirojnë të përfitojnë, klubet ulen në bisedime
Filipe Kutinjo dhe Ba jerni i Mynihut duket se po funksionojnë shumë mirë me njëri-tjetrin. Braziliani ka siguruar menjëherë një vend në formacionin e parë, duke lënë në stol edhe një nga ikonat bavareze, Tomas Mylerin. A do të jetë e ardhmja e brazilianit në Bundesligë? Një gjë është e sigurt, Bajerni ka të drejtën e blerjes dhe duhet të paguajë 120 milionë euro për të. Por "Bild" zbulon se Kutinjo mund t'u kushtojë më pak gjermanëve. Arsyeja? Skuadra e Barcelonës ka vendosur së bashku me drejtuesit e saj se lojtari nuk do të qëndrojë më në skuadrën katalanase, pavarësisht se si do të jetë performanca e tij në fushën e lojës me kampionët e Gjermanisë. Drejtuesit e të dyja skuadrave pritet të ulen në tryezë dhe të negociojnë për çmimin e kartonit të lojtarit, i cili mund të blihet nga kampionët e Bundesligës më lirë se ç'u mendua në fillim. Barcelona është duke menduar për të bërë një sulm të fundit për brazilianin Nejmar dhe për këtë do t'i duhej çdo qindarkë.
PLANI B - Por çfarë pritet të ndodhë nëse Bajerni vendos të mos marrë shërbimet e 27vjeçarit? Kujtojmë që ai ka një kontratë me spanjollët deri në 2023-shin dhe më pas mund të lihet i lirë, por kjo vështirë të ndodhë, pasi Bajerni pritet të përdorë mundësinë e blerjes në fund të sezonit. Një tjetër hipotezë është edhe rikthimi në Angli. Edhe pse nuk ka asnjë emër konkret, lojtari nuk është i huaj në ishull. Kutinjo e njeh
mirë Premier Ligën, pasi ishte pjesë e Liverpulit përpara se të shkonte në Barcelonë. Gjithsesi, tifozët bavarezë mund të qëndrojnë të qetë, pasi Rumenige dhe Hënes kërkojnë ta mbajnë me çdo kusht fantazistin, i cili i ka dhënë skuadrës një fytyrë të re. Vetë
lojtari është shprehur në javët e fundit se ndihet shumë mirë në Mynih dhe se është shumë i lumtur që është pjesë e një skuadre të madhe si Bajerni. Karriera e tij në Gjermani është vetëm në fillim dhe me shumë mundësi do të zgjasë edhe për shumë vite të tjera.