Kriza financiare, Milani nxjerr yjet në shitje
Rrezikojnë Suso e Xhixho, por në treg edhe të tjerë
146 milionë euro, një humbje në bilanc që nuk ka se si të mos ndikojë në strategjitë e së ardhmes afatshkurtër të Milanit. Kuqezinjtë do të duhet të rregullojnë gjendjen e arkave dhe përveç vështirësive për merkaton në hyrje, drejtuesit mbase do të detyrohen të shesin ndonjë nga xhevahiret e ekipit që aktualisht stërvitet nga Stefano Pioli.
XHIXHO E SUSO – Arkëtimet tashmë më shumë se nevojë janë një detyrim. Boban e Maldini do të duhet të shesin, duke u përpjekur të ndikojnë sa më pak në cilësinë e organikës. Nuk përjashtohet që Milani të vendosë të bëjë “kurbane” në merkato, duke lejuar që në janar largimin e njërit mes Susos dhe Xhanluixhi Donarumës. Pikërisht kjo dyshe është ajo që mund t’i garantojë klubit fitimin më të madh sepse spanjolli ka ardhur falas ndërsa portieri është produkt i ekipeve zinxhir. Për 40 milionë euro mund të largohet sulmuesi anësor, teksa për “kokën” e Xhixhos duhen 60 milionë euro.
MUNDËSI REALE – Për Donarumën gjatë verës pati bërë hapa konkretë vetëm PSG-ja, duke ofruar 20 milionë euro dhe kartonin e Alfons Areolas. Ky i fundit tashmë ndodhet në Madrid, ku përfundoi në këmbim të Navasit. Në këto rrethana, përveç blerësit të ri, duhet edhe një ekip që t’i garantojë
Donarumës ekskluzivitetin e portës dhe një pagë mbi 6 milionë eurot në sezon që arkëton nga “Djalli” çdo vit. Duke shitur 20-vjeçarin, italianët do të kursenin 11 milionë eurot në sezon që ai i kushton borderosë (rrogë dhe taksa), plus do të arkëtonin
një shumë të majme që do të rregullonte disi gjendjen e mjeruar të arkave. Me Suson diskutimi është më i përmbajtur në aspektin e milionave, por fitimet janë gjithashtu të konsiderueshme. Me largimin e mëngjarashit Milani do të kursente thuajse 6
milionë euro ne vit mes rrogës e taksave, do të përfitonte 40 milionë euro nga kartoni, e sidomos do të shmangte çdo diskutim mbi rinovimin e kontratës, një kërkesë që babai menaxher i futbollistit e ka bërë të qartë që në fillim të sezonit aktual.
ALTERNATIVAT – Përveç Susos e Xhixhos, largimi mund të prekë edhe Lukas Paketan. 40 milionë euro thuhet të ketë gati PSG-ja për brazilianin, teksa edhe për Piontek ka sirena merkatoje pavarësisht se vlera e polakut ka rënë jo pak me fillimin e sezonit
të ri. Kesi është gjithashtu një profil që kuqezinjtë do ta sakrifikonin pa shumë pengje, teksa vështirë që klubi të privohet që në janar nga Alesio Romanjoli. Kapiteni mund të përfundojë në treg gjatë verës, kur edhe kriza e “Djallit” të ketë marrë një formë më konkrete.