Shfryn Calja: Mora 4 medalje, qeveria nuk më jep paratë
"Në Shqipëri po m'i hedhin në kosh të gjitha arritjet historike"
Briken Calja ka shpërthyer me anë të një statusi në rrjetet sociale dhe shkak është bërë situata në të cilën ai po kalon. Peshëngritësi shqiptar tregon se nuk ka marrë asnjë shpërblim dhe i bën thirrje Kryeministrit dhe ministres së Sporteve për të bashkëpunuar dhe të zgjidhet kjo situatë aspak e mirë për të. Ai shprehet se është lodhur nga burokracitë dhe se ka bërë çdo gjë për të marrë atë që meriton. Gjithashtu, bën dhe një krahasim me rastin e kundërshtarit të tij bullgar, që është stimuluar nga qeveria për arritjet e tij.
Reagimi i plotë:
I ZHGËNJYER DHE I ZEMËRUAR, POR KRYELARTË
"Përgjatë dy viteve të fundit kemi arritur rezultate historike për sportin shqiptar dhe për peshëngritjen në veçanti! Por në Shqipëri, këto triumfe historike të hidhen në kosh sa hap e mbyll sytë. Marrim një shembull konkret: Në Bullgari, kundërshtarit tim në peshën 73 kg, Andreev Bozhidar, pas 21 ditëve, kohë e cila është normale për sa i përket pritjes që i bëhen analizave antidoping, ministri përkatës i Sporteve i bën pritje zyrtare dhe i siguron mbështetje të mëtejshme institucionale, financiare dhe morale për garat e ardhshme. Ndërsa në një univers paralel, Briken Calja në Shqipëri, fitues i 4 medaljeve të arta e 2 të argjendta evropiane dhe një bronzi botërore, ende nuk është shpërblyer për të gjitha medaljet që i takojnë dhe është në pritje, ende pas 19 muajve, për një pritje zyrtare nga ana e institucioneve përkatëse. Ky është skandal dhe qesharak
njëkohësisht. Meqë ra fjala te shpërblimet, po ju informoj e sqaroj që zyrtarët e ministrisë, me anë të disa argumenteve qesharake, nuk zbatojnë dhe hedhin në kosh rregullat e Federatës Botërore të Peshëngritjes dhe V.K.M-në për shpërblimet në sport. Unë po kërkoj zbatimin e një VKMje, asgjë më shumë, as lëmoshë e asgjë. Për Brikenin flet rezultati dhe jo burokracitë dhe parazitizmat e rëndomta që gjejmë në shoqërinë tonë. Realisht ligji i sportit dhe VKM-të përkatëse janë
përmirësuar ndjeshëm, po problemi qëndron te zbatimi i tyre. Po vuaj padrejtësisht këtë çështje. Dispozitat ligjore të parashikuara në V.K.M dhe ligjin shqiptar më japin plotësisht të drejtë të përfitoj shumë herë me tepër se çfarë kam përfituar deri më sot. Konkretisht, në 2018, kam marrë 3 medalje ari dhe jam shpërblyer vetëm për një të tillë, shto dhe faktin që për shpërblimin e një medaljeje të vetme kam pritur 1 vit të plotë kalendarik, ndërkohë ligji shqiptar e parashikon për 3 muaj. E njëjta gjë ndodh dhe me medaljet e 2019. Më kanë kërkuar dokumentacion nga Federata Botërore e Europës, Komiteti Olimpik dhe Federata Shqiptare. Ja kam dorëzuar të gjitha dokumentet përkatëse dhe ministria i ka dorëzuar vetë në institucionet përkatëse. Tani nuk dihet se ku qëndron problemi. Çfarë duhet të bëj më Briken Calja? Prisni, se ka akoma: Çështje tjetër është dhe punësimi i medalistëve të kampionatit Evropian dhe Botëror. Konkretisht, nga ana ligjore, unë përfitoj
punësim pranë Ministrisë se Brendshme ose të Mbrojtjes, por deri tani asgjë e tillë s'ka ndodhur edhe pse dokumentacionet janë plotësuar të gjitha zyrtarisht. Se kur do të plotësohen këto gjëra nuk e di, mbase pas një shekulli! Ligji dhe VKM-ja për sportet kanë një vit që kanë hyrë në Fletoren Zyrtare. Jam i lodhur nga këto burokracira. Kur do të vijë dita që do të marrim atë çka meritojmë. pa u bërë pjesë e këtyre dogmave skandaloze të shoqërisë sonë. Njëkohësisht, nëpërmjet këtij postimi
publik, i drejtohem Kryeministrit dhe ministres së Arsimit dhe Sporteve. Jam i gatshëm të bashkëpunoj për t'i dhënë drejtimin e duhur zgjidhjes së kësaj situate. I zhgënjyer, i zemëruar, por kryelartë. Juaji, Brikeni", shkruan në postimin e tij, sportisti më i suksesshëm shqiptar në arenën ndërkombëtare. Kujtojmë që Calja vetëm disa javë më parë arriti të renditet i pesti në botë, në evenimentin e zhvilluar në Tajlandë, aty ku madje mori edhe një medalje bronzi në stilin e shkëputjes.