Sasuolo, “mace e zezë” për Interin
Statistikat janë të hidhura, në pesë duelet e fundit interistët nuk njohin fitore
Do jetë sfida e parë mes Sasuolos dhe Interit pa Xhorxho Skuincin, presidentin e klubit jeshilzi, i cili kundër zikaltërve ka pasur mjaft kënaqësi. Mjafton të mendohet që në gjashtë precedentët në "Mapei Stadium", Sasuolo ka fituar plot katër herë, kundrejt dy sukseseve interiste. Skuadra nga Rexho Emilia, pra, i ka ndalur shpesh rrugën Interit, i mposhtur në disa raste edhe në "San Siro". Kureshtar fakti që në Rexho Emilia plot tri herë (të dielën do jetë e katërta), sfida do zhvillohet në orarin e drekës, në 12:30. Në rastet paraardhëse kujtohen disa polemika... Dhe në pesë duelet e fundit, zikaltrit nuk njohin fitore. PËRLESHJA ME IKARDIN
- Përballja e parë në absolut ka rezultuar një disfatë historike për vendësit, që porsa kishin zbarkuar në Serinë A: një humbje 0-7 e turpshme, e 22 shtatorit 2013, me Masimo Moratin që festonte mbi të gjitha rikthimin (me dopietë) të Diego Militos, pasi sulmuesi vinte nga një dëmtim pas shtatë muajsh. Më 1 shkurt 2015 regjistrohet hakmarrja e parë: në ditën e debutimit të Marselo Brozoviç, Zaza, Sansone dhe Berardi firmosën fitoren 3-1. Ikardi gjeti golin e vetëm në fund, përpara se të përleshej me ultrasit, të inatosur deri në atë pikë sa i rikthyen prapa fanellën.
VITI ME DY FYTYRA - Interit nuk i ecën më mirë në 2016ën. I njëjti rezultat, i vulosur nga një dopietë e Politanos (sot zikaltër dhe me shanse për të luajtur nga minuta e parë pas dëmtimit të Sançezit) dhe golat e Pelegrinit dhe Palasios. Tjetër figurë e shëmtuar e zikaltërve kundër një skuadre nën mesataren. Në dhjetorin e po të njëjtit
vit, Interi arrin të dalë fitues falë realizimit të Kandrevës në fillim të pjesës së dytë. Në pankinë ndodhej Stefano Pioli, milanisti i freskët.
SPALETI - I takon Luçiano Spaletit të asistojë në pankinën e "harakirit" të 2017-ës në Krishtlindje. Ikardi rikthehet në vendin
e krimit dhe Konsilji, i cili shpesh ekzaltohet kur shikon zikaltër, i pret Mauros penalltinë e barazimit të mundshëm 1-1 pas golit të Falçinelit. Akti i gjashtë dhe i fundit është ai i kampionatit të kaluar: vendos Berardi me penallti. Tani sfida i kalon Kontes.