Fushatë rinovimesh në Torino, edhe Dibala në apel
Pas Paulos, në listë edhe Shezni, Kuadrado e Matuidi
Te Juventusi bëhen gati për një fushatë rinovimesh, duke parë se disa prej futbollistëve bardhezinj janë në skadencë kontrate, apo meritojnë edhe një shpërblim për atë që kanë treguar në fushë, gjatë sezoneve të fundit. Nëse për dy mesfushorët, Blez Matuidi e Huan Kuadrado, përflitet prej kohësh se do të thirren në apel nga drejtori sportiv, Fabio Paratiçi, duke parë se francezi është në skadencë në verë, ndërsa kolumbiani po konfirmohet një lojtar që nuk duhet humbur, ajo që ka surprizuar në orët e fundit është se drejtuesit e Juves duan të zgjasin edhe marrëveshjen me Paulo Dibalën. Pasi gjatë verës provuan që ta shesin me çdo kusht, argjentinasi papritur i ka bërë të gjithë që të ndryshojnë mendje, ndoshta pas golit ndaj Interit, ose zgjatja e kontratës aktuale (skadon më 30 qershor 2022) mund të jetë edhe një strategji për të rritur edhe më tepër vlerën e Paulo Dibalës, me numrin 10 të bardhezinjve që kujtojmë se fiton 7 milionë euro neto në sezon, plus që ka edhe një klauzolë prej 500 mijë eurosh shtesë, në rast të një numri të caktuar golash dhe prezencash. Në të njëjtën kohë, një kontratë e re parashikohet edhe për portierin
Vojceh Shezni. Polaku ka një akord me bardhezinjtë deri më 30 qershor 2021, por duke parë kërkesat në rritje ndaj mbrojtësit ekstrem, Paratiçi do të kërkojë një zgjatje të kësaj marrëveshjeje deri në vitin 2024, por edhe me një rritje page në program, e cila do të kalojë nga 3.5 milionët neto aktualë, në 4.5 milionë, plus një seri bonusesh në varësi të arritjeve të klubit. Shezni duket se po konfirmohet si një pasardhës i denjë i legjendës Xhanluixhi Bufon, i cili në këtë sezon u rikthye në Torino për të bërë pikërisht rezervën e ishportierit të Arsenalit.