Rrezikohet bojkoti, Valverde: Do luajmë më 26 dhe pa probleme

“Lionel Mesi po shkon drejt arritjes së formës optimale”

Trajneri i Barcelonës ka besim se klasikja e ardhshme mes Barcelonës dhe Realit do të luhet sipas axhendës, më 26 tetor, pavarësisht frikës për sigurinë. Trazirat në Katalonjë kanë ngjallur pasiguri për sfidën që do të luhet në “Camp Nou” dhe autoritetet po mendojnë shtyrjen e saj për një tjetër datë, duke qenë se klubet refuzuan që ta spostojnë ndeshjen në Madrid. Por në konferencën për shtyp, trajneri i Barçës tha: “Ndeshja është planifikuar për 26 tetor dhe unë nuk kam dyshime se do të luhet atëherë dhe pa probleme, duke respektuar kundërshtarët dhe këdo tjetër të përfshirë. Nuk e di se çfarë vendimi do të marrë federata. Ne do të respektojmë cilindo vendim. Do edhe 9 ditë që të luhet ndeshja dhe po flitet shumë. E njëjta gjë u tha edhe më 1 tetor (data e referendumit katalanas në 2017ën) dhe një javë më vonë ne luajtëm në Vanda, ku të gjithë prisnin një ngjarje dramatike, por në fund rezultoi një ndeshje e shkëlqyer”. Përpara se të shkohet te klasikja, Barça do të udhëtojë drejt Eibarit për të marrë rezultatin dhe trajneri konfirmoi se Mesi është pranë rikthimit në gjendje optimale: “Ai është drejt procesit të të qenurit 100%. Ndeshjen e fundit luajti 90 minuta dhe shënoi. Ai duhet të gjejë ngadalë formën e tij më të mirë. Ka luajtur vetëm një ndeshje të plotë këtë sezon. Shpresojmë të na japë

më shumë në ndeshjet e ardhshme”. Valverde është i zhgënjyer se do të udhëtojë drejt qytetit bask pa Osman Dembelenë, i cili është i pezulluar për shkak të komenteve që bëri ndaj arbitrit në ndeshjen kundër Sevijes. “E pyeta Dembelenë se çfarë i tha

arbitrit dhe ka një dallim të vogël mes asaj që ai më tha dhe asaj që është shkruar në raportin e arbitrit. Ka raste kur arbitrat të ndëshkojnë me karton të kuq pasi thua disa fjalë dhe raste të tjera kur nuk e bëjnë edhe pse ti mund të kesh thënë gjithë të zezat”.