Interi gdhihet i pari, Lukaku e Martinez super
Tremb autogoli i Shkrinjarit në fund, por Konte e gdhin i pari
Interi rikthehet te fitor ja. Me lodhje dhe pak vuajtje në fund, por kalon Breshan dhe rimerr për një natë kreun e kampionatit. Nevojiteshin golat për të triumfuar, edhe një herë suksesi mban firmën e "LuLa": Lautaro zhbllokon sfidën në pjesën e parë, i ndihmuar nga devijimi i Çistanës; Lukaku dyfishon me një "silur" në shtyllën e dytë. Autogoli i Shkrinjarit i jep ngjyra fundit, por nuk u mjafton "Dallëndysheve" për të marrë një pikë.
LAUTARO ME FAT Zikaltrit shfaqen menjëherë në zonën e rreptësisë kundërshtare me Kandrevën që kërkon Lukakun, topi megjithatë nuk mbërrin në destinacion, pasi prapavija vendëse spastron. Në të 4-tën Barela avancon në korsinë e majtë dhe harkon një krosim për sulmuesin belg, i cili këtë herë godet me kokë, duke mos gjetur portën. Deri tani formacioni i Korinit qëndron shumë i tërhequr dhe angazhohet në largimin e rrezikut, duke mos arritur të krijojë aksione shqetësuese për Handanoviçin, e aq më pak për trion mbrojtëse të ndërtuar nga Godin, De Vraj dhe Shkrinjar. Me kalimin e minutave, zikaltrit vazhdojnë të sulmojnë dhe të koleksionojnë goditje nga këndi. Në të 13-ën, pikërisht në zhvillimet e një këndoreje Bizoli, në përpjekje për të paraprirë Lautaro Martinezin, goditet nga argjentinasi, i cili e shkëmben për topin: lojtari i "Dallëndysheve" megjithatë arrin të ngrihet shpejt. Interi nuk i lejon një moment pushimi Breshas që në të 23-tën thyhen nga e djathta nga jashtë zone e numrit 10 interist, i favorizuar edhe nga devijimi i Çistanës që befason portierin Alfonso dhe në formën e parabolës përfundon në rrjetë. Pasi gjen golin, skuadra e Kontes tenton t'i mbyllë të gjitha hapësirat në gjysmëfushë për të mos u dhënë
mundësi kundërshtarëve të barazojnë. Përpara pushimit, në të 37-ën, Galjardini rrezikon tepër kur mban krahët e zgjatura në brendësi të 16 metrave, por për fat topi e prek në qafë dhe arbitri e VAR-i nuk ndërhyjnë.
"PREDHA" E LUKAKUT
- Në fillimin e pjesës së dytë Bresha nis të zhvendosë ekuilibrat dhe ndryshon totalisht qëndrim krahasuar me pjesën e parë të lojës, kur kishte pësuar në mënyrë shumë pasive iniciativat e kundërshtarëve. Në të 47-ën Sabeli shërben Balotelin, i cili tremb Handanoviçin me një tentativë potente nga distanca. Në rastin e radhës, mbrojtësi ekstrem zikaltër shpëton portën nga goditja e Donarumës. Në momentin kur bardheblutë nisin të fitojnë terren, zikaltrit shënojnë edhe golin e dytë: "predhë" e Lukakut, e paparashikueshme, që befason Alfonson. Në lojë hyn edhe Emanuele Ndoj, që sjell fat,
sepse vetëm pas 1 minute, në të 76-ën, Bizoli gjen hapësirën për të hyrë në zonën e Handanoviçit, driblon një mbrojtës dhe godet, topi preket nga Shkrinjari i pafat dhe ndalet në rrjetë. Për minutat finale Konte i beson talentit Espozito për t'i dhënë pak frymëmarrje Lukakut. Në shtesë Handanoviç mban të pastër kuadratin, duke zbehur përpjekjet e Breshas që në çdo rast del nga fusha me kokën lart.