Raiola “grabit” Romanjolin, Boban takon Rakitiçin
Pa Champions-in duket i vështirë qëndrimi i mbrojtësit
Nëse Mino Raiola hyn në mes në një klub të caktuar dhe për një futbollist të caktuar, pa dyshim që në horizont parashikohen “telashe” të mëdha. Arsyeja është se menaxheri i mirënjohur italo-holandez di se si t’i vlerësojë dhe t’u ofrojë klientëve të tij maksimumin e mundshëm, t’u garantojë kontrata faranike, aq më shumë kur lojtari për të cilin punon është një yll i padiskutueshëm. Dhe pas lajmit të fundit që raporton “SportMediaset”, kampioni i fundit që është bërë pjesë e “skuderisë” së futbollistëve të Raiolës është Alesio Romanjoli. Qendërmbrojtësi ka vendosur që të ndjekë të njëjtën rrugë si dy milanistë të tjerë, Xhanluixhi Donaruma e Xhakomo Bonaventura dhe pa dyshim që ky lajm frikëson jo pak drejtuesit e “Djallit”. Arsyeja është se Mino Raiola, me të marrë një futbollist “në dorë”, për tepër si në rastin e kapitenit të Milanit, që për më shumë është në skadencë më 30 qershor 2022, lëvizja e parë e menaxherit do të jetë rivlerësimi i kontratës së Alesio Romanjolit. Aktualisht, 24-vjeçari përfiton 3.5 milionë euro neto në sezon, por duke parë ofertat e ardhura në verë për numrin 13 kuqezi, si nga Juventusi, Barcelona, Reali i Madridit apo edhe nga Mançester Siti, pa dyshim që të gjitha këto do ta shtyjnë Raiolën që shumë shpejt të paraqitet në “Casa Milan” dhe të kërkojë rishikimin e kontratës së tij, ku kërkesa e
parë do të jetë rritja e pagës së qendërmbrojtësit. Madje, bisedime për të pasuruar edhe më shumë klientët e tij kanë nisur edhe për dy kuqezinjtë, Donaruma dhe Bonaventura. Për portierin, Raiola kërkon që të kalojë nga 6 në 7 milionë euro neto në sezon, ndërsa për mesfushorin,
nga 2 në 5 milionë euro neto, ndryshe menaxheri kërcënon se mund t’i largojë nga Milani. Dhe ndoshta i njëjti argument mund të vlejë edhe për Romanjolin, diçka që e tremb jo pak “Djallin”, duke parë edhe krizën financiare që e ka kapluar në vitet e fundit.