“Lëmshi” me kartonët, Arapi: Do jem në fushë ndaj Tiranës
"Kam tre kartonë të verdhë, nuk e kam plotësuar numrin"
Teuta doli me një pikë nga transferta e Ballshit. Skuadra e drejtuar nga Bledi Shkëmbi barazoi pa gola përballë Bylisit dhe tashmë vëmendja është përqendruar te sfida e radhës ndaj Tiranës në shtëpi. Por, sikur të mos mjaftojnë dy rezultate negative, tashmë trajneri Shkëmbi duhet të mendojë edhe për repartin e mbrojtjes. Kapiteni Renato Arapi u ndëshkua me karton të verdhë, por kjo nuk do të thotë se nuk do të jetë gati për bardheblutë, pasi ai nuk ka plotësuar numrin katër të verdhëve dhe do jetë gati për ndeshjen ndaj Tiranës. Kapiteni i Teutës, Renato Arapi, ka sqaruar shkurtimisht për "Panorama Sport" çështjen e kartonëve të verdhë. "Kam lexuar në media që nuk do të jem gati për sfidën me Tiranën, por dua t'i hedh poshtë këto lajme, pasi nuk është e vërtetë. Unë kam tre kartonë të verdhë dhe jo katër siç është përfolur këto ditë në media. Do të jem në fushë përballë Tiranës, pasi gjithçka është konform rregullores që parashikohet se një lojtar mungon kur ka katër të verdhë dhe jo tre", ka përfunduar kapiteni i durrsakëve. Një mungesë e sigurt do të jetë ajo e Todorovskit, pasi u ndëshkua me karton të kuq në fundin e ndeshjes ndaj ballshiotëve. Siç duket, barazimi në Ballsh i ka lënë me pasoja durrsakët dhe Shkëmbi duhet të kthejë sytë nga stoli për të zëvendësuar mungesën e rëndësishme,
Todorovski. Një "dhimbje koke" për trajnerin korçar, i cili përballë do të ketë një skuadër me cilësi në repartin ofensiv si Tirana. Ndonëse organika e Teutës është e pasur dhe nuk do jetë shumë problem për të aktivizuar si titullarë Fabian Beqajn në vend të Todorovksit, sërish Teuta duhet të ketë kujdes.