Mesi rikthehet magjik, dopiogol e asist për Barçën
Arrin 50 gola nga goditjet e dënimit, frymëzon katalanasit dhe i ngjit në krye
Leo Mesi u akuzua se këtë vit është shumë mbrapa në krahasim me sezonet e tjera për gola të shënuar. Me të drejtë, por ja ku erdhi përgjigjja. Dy supergola dhe dy asiste në fitoren spektakolare të Barcelonës 5-1 kundër Vajadolidit. “Pleshti” udhëheq formacionin katalanas drejt këtij suksesi të rëndësishëm, i cili ishte i shtati radhazi për skuadrën e Ernesto Valverdes. “Camp Nou” konfirmohet një bunker për Barcelonën, e cila ka një mesatare të frikshme golash, 4 për ndeshje, ndërsa Leo konfirmohet jashtëtokësor.
ZHBLLOKOHET SHPEJT - Ndeshja merr drejtimin e duhur për Barcelonën që në minutat e para. Kur kronometri shënonte vetëm 2 minuta, ishte Klemo Lengle që ngriti peshë të pranishmit me një goditje të fortë, e cila u ndal në rrjetë. Miqtë provojnë të prishin festën e të zotëve të shtëpisë me barazimin e përkohshëm të Kiko Olvias. Por kur në fushën e lojës është Leo Mesi, festa bëhet më e madhe dhe nuk ka shanse të prishet. “Pleshtit” i mjaftojnë vetëm dy lëvizje dhe 5 minuta për të vulosur këtë ndeshje. Në 29-ën jep një asist gjenial për Vidalin, të cilit i mjaftoi një prekje në zonë për ta dërguar në rrjetë. Pastaj erdhi goli spektakolar nga goditja e dënimit. Distanca ishte e largët, por kapiteni katalanas e dërgon
në trekëndësh, duke arritur golin e tij të 50-të nga goditjet standarde. Pjesa e parë përfundoi 3-1 për Barcelonën pas një dominimi total të skuadrës së Valverdes.
SPEKTAKËL - Në të dytën kishte sërish vend dhe kohë për spektaklin e kapitenit të
katalanasve, i cili gjen sërish golin dhe jep një asist për Luis Suarezin. Fillimisht, Leo merr një asist në hyrje të zonës nga Rakitiç dhe e godet menjëherë duke thyer portierin, ndërsa pas dy minutash shërben në një korridor të ngushtë për Luis Suarezin dhe plotësohet
mbrëmja perfekte. Uruguaiani nuk gaboi në brendësi të zonës dhe vulosi shifrat në 5-1. Kjo Barcelonë ka filluar të funksionojë ashtu siç duhet, sidomos në La Liga. Pas kësaj fitoreje, Barcelona mori përkohësisht vendin e parë dhe pret ndeshjen e Granadës.