Ish-trajneri i Laçit rreh fëmijët pse humbën ndeshjen
Zbulohet videoja ku Ndue Tarazhi dhunon lojtarët e vegjël pasi kishin humbur ndeshjen
Një video tronditëse po qarkullon në rrjetet sociale, teksa dje është bërë virale në internet. Aty shihet një nga ish-trajnerët e ekipeve të moshave të Laçit ndër vite, Ndue Tarazhi, i cili ofendon dhe godet futbollistët e vegjël. Bëhet fjalë për një video të xhiruar nga një aparat celular kohë më parë, pasi aktualisht Tarazhi, i cili është një emër i njohur i futbollit në qytetin e Laçit, nuk drejton ndonjë nga ekipet e moshave. Për herë të fundit ai ka qenë trajner i U-17 të kurbinasve në vitin 2016. Në video shihet se si ai qëllon me radhë futbollistët e tij pas një ndeshjeje ku Laçi është mundur. Ish-trajneri, i acaruar me lojtarët e tij, tregon se kush kishte faj gjatë ndeshjes, ndërsa fillon edhe të godasë lojtarët e vegjël, të cilët qëndrojnë të ulur para tij. Në një moment, një nga lojtarët ngrihet në këmbë, pasi nuk duron kritikat dhe ofendimet. Pamjet janë vërtet të turpshme, ashtu si edhe fjalori i trajnerit drejtuar fëmijëve.
OFENDIMET
Gazeta zbardh edhe ofendimet që Tarazhi u bënte lojtarëve. "Ti, mirë je? Po ti, mirë je dhe ti? Po ti, ku je? Ata bënë dy gola dhe i bënë për fajin tënd. Po ti, do me lujt futboll, do me lujt në Greqi? Pisa! S'ju vje turp, maskarenj. Palaço. Doni me lujt futboll me Laçin. Zagarë! A ju thashë të hyni me mentalitet fituesi? Si jua bëjnë golin ju të dyve? Asnjë nuk i turret topit. A ju kam thënë të bëni regjim 1-ditor? Nuk keni fjetur gjithë natën, rrini nëpër televizor e kafe, nuk ju vjen turp. Ai ekip lask***sh atje, me ju mund ata, mër pisa. Nuk kam çfarë ju them, në dash fitoni, në dash humbni. Pisa! Ju jeni pisa. Dy gola ty t'i kanë bërë. Të dy. Ti i ke ngrënë. Nuk ju vjen turp. Në duel shpejtësie. Çfarë ke që sheh? Ulu aty, se ta marr shpirtin. Ulu këtu, ulu këtu, këtu", thoshte ndër të tjera Tarazhi para ekipit.