Zhgënjimi Oto Xhon, Skënderbeu me “nëntë false” ndaj Laçit

Dëmtimi i Blerim Krasniqit ka treguar se Skënderbeu përtej problemeve të tjera vuan shumë edhe në majën e sulmit. Në dy ndeshjet e fundit korçarët nuk janë treguar efikasë për të shfrytëzuar rastet e shumta. Ekipi ka prodhuar në dy takimet e fundit, por ka arritur të marrë vetëm një pikë. Dëmtimi i Krasniqit mund të ishte një mundësi "e artë" për sulmuesin nigerian, Oto Xhon, për të treguar veten dhe mbi të gjitha për të vënë kandidaturën se e meriton një fanellë titullari në vijim. Në ndeshjen ndaj Flamurtarit ai e pati mundësinë, por Oto Xhon nuk e ka shfrytëzuar, ku përtej asaj që duhet të tregonte, ka marrë një lumë me kritika. Pas ndeshjes me Flamurtarin, trajneri i Skënderbeut, Ilir Daja, nuk e ka fshehur më pakënaqësinë ndaj sulmuesit. Trajneri i ka treguar qartazi arsyet se përse zgjedhja e tij nuk është Oto Xhon, duke iu referuar gabimeve dhe rasteve të shumta të shpërdoruara nga ana e sulmuesit nigerian në ndeshjen e fundit. Qartazi, Oto Xhon nuk është më një zgjidhje, jo vetëm e parë, por as emergjente e Skënderbeut që duket se po mendon për një alternativë të re. Dëmtimi i Krasniqit ka lënë zbuluar një repart të tërë dhe së bashku me Muzakën janë dy mungesat që dëmtojnë së tepërmi korçarët. Pavarësisht se golat janë shënuar me pikatore edhe nga lojtarët e tjerë të sulmit, përfshi këtu dhe shtatlartin kavajas, ajo që e justifikon këtë të fundit është rrezikshmëria që i jep ekipit. Me Krasniqin në lojë Skënderbeu është më imponues në manovrën sulmuese dhe mbi të gjitha mban lart ekipin kundërshtar, sikundër u tregua me Kukësin. Një gjë e tillë nuk funksionoi me nigerianin, që duket se i ka thënë përfundimisht lamtumirën fanellës së titullarit.

ZGJIDHJA - Në kushte të tilla,

trajneri Ilir Daja duket se po mendon një tjetër vendosje për të mbuluar mungesën e Krasniqit, për sa kohë ai vazhdon të jetë i dëmtuar. Numri një i pankinës korçare është duke menduar një vijë të parë me një "nëntë false" për t'i dhënë skuadrës së tij pikën e referimit. Gjatë kësaj jave përgatitore deri në rikuperimin e Krasniqit, trajneri Daja është duke bërë një gjë të tillë, duke provuar herë Gripshin dhe herë Ndekin si sulmues të fshehur. Ndeshja ndaj Laçit po afron dhe deri në janar, kur hapet merkatoja, trajneri bardhekuq do të duhet të gjejë një zgjidhje sa herë Krasniqi do të mungojë.