Zyrtare, Artan Bano merr drejtimin e Egnatias

Egnatia gjen pasardhësin e Ndriçim Kashamit. Ashtu siç “Panorama Sport” e kishte paralajmëruar, “timoni” i ekipit i është besuar Artan Banos. Trajneri i ri pas negociatave intensive, gjatë pasdites së djeshme ka gjetur edhe akordin. Prej tij pritet një kthesë rezultatesh, ndërsa kujtojmë se pas 6 javësh të luajtura në Grupin A të Kategorisë së Parë, rrogozhinasit kanë grumbulluar vetëm 8 pikë. Vendi i 5-të nuk u përgjigjet objektivave, ndaj drejtuesit bënë këtë lëvizje. Gerd Haxhiu, Gentian Stojku apo edhe Gentjan Begeja ishin emra të tjerë që u përfolën për këtë post, por klubi zgjodhi lushnjarin, i cili më parë ka drejtuar edhe Lushnjën apo Shkumbinin.

Ai pritet të prezantohet sot para lojtarëve, pasi deri dje ekipi është stërvitur prej zv.trajnerit Eduart Thartori. KONFIRMIMI - Lajmin e konfirmon për “Panorama Sport” administratori Olsi Dranga. Ai shpjegon se lushnjari ishte zgjedhja e duhur dhe me të do të shkojnë drejt realizimit të objektivave. “Pas disa kandidaturash për pasuesin e Ndriçim Kashamit, arritëm akordin me një trajner me përvojë si Artan Bano. Trajneri i ri kishte një CV të përshtatshme, që na bindi për të mos e menduar dy herë si emër. Vite më parë ka dhënë kontribut në Rrogozhinë si futbollist, ku ka spikatur në çdo rast. Gjithashtu, e njeh më mirë ambientin e punës së futbollit në qytetin tonë, ku gëzon edhe respekt. Pas diskutimeve me presidentin e klubit dhe kushtet që i paraqitëm Banos, ai shprehu gatishmërinë e tij për të marrë drejtimin. Dhe për pasojë u arrit marrëveshja përfundimtare. Mendoj se është zgjedhja e duhur, me të Egnatia do të jetë në nivelet ku meriton në Kategorinë e Parë. Projekti për skuadrën sapo ka nisur, ndaj të gjithë të jenë të bindur se tradita për të qenë dinjitozë për çdo objektiv do të jetë shumë pranë. Presim që trajneri të nisë nga puna direkt, pasi na pret në fundjavë transferta me Tërbunin”, u shpreh administratori i rrogozhinasve. Aldo Buzi