Dinastia Vata te Sëlltiku, djali i ish-kapitenit firmos si profesionist
Rudi: Po nis një histori e bukur, shpresoj të më kalojë
Mbiemri Vata duket se është i destinuar për të qëndruar te Sëlltiku. Jo vetëm kaq, por edhe për të bërë histori dhe për të lënë gjurmë në ecurinë e këtij klubi ndër breza. Në Skoci, emri dhe mbiemri i ish-kapitenit të Shqipërisë është shënuar me germa të arta, por tanimë, pritet që ai mbiemër të zëvendësohet me një tjetër emër. Pas Rudi Vatës, që për sezonet 1992-1996 ishte pjesë e klubit skocez, me një kontratë profesioniste është lidhur me klubin jeshil edhe i biri i tij, Roko Vata.
ROKO VATA - Pasi i ati mbahet mend edhe sot e kësaj dite si një nga futbollistët me shumë kontribut
në skuadrën skoceze, drejtuesit e klubit i kanë besuar një tjetër futbollisti me këtë mbiemër. Roko, i lindur më 18 prill të 2005ës, dje ka firmosur kontratën e parë si profesionist në karrierën e tij që sapo ka nisur dhe po rritet. Momentalisht, ai vlerësohet si një element shumë i rëndësishëm për
akademinë e klubit të Sëlltikut dhe është pjesë e skuadrës U-16 të Sëlltikut. Bashkë me babanë e tij, ish-kapitenin e Kombëtares Rudi Vatën, ai firmosi kontratën si profesionist gjatë mesditës së djeshme, në prani të administratorit të Sëlltikut, Piter Lauell, si edhe drejtorin e akademisë së klubit jeshil, Kris MekKart.
- Për një prind, fëmija është krenaria më e madhe dhe nuk ka si të jetë ndryshe edhe për Rudi Vatën. Ish-kapiteni i Kombëtares, në një prononcim të shkurtër për “Panorama Sport”, komenton edhe hapat e parë të karrierës së të birit si profesionist. “Historia
vazhdon. Sa më larg, aq më mirë. Rruga është e gjatë dhe vështirësitë do të jenë të mëdha. Besoj se një histori shumë e bukur do të fillojë së shpejti. Aktualisht djali po luan me Sëlltikun U-16, por unë shpresoj shumë që të më kalojë”, është shprehur Rudi Vata për gazetën.