Shpërthen Zef Gjoni: Bashkia dhe klubi e kanë injoruar boksin
Trajneri i Vllaznisë dorëzohet: S’kemi para për ta mposhtur Tiranën në kampionat, ndaj do të largohem
Në prag të Kampionatit Kombëtar të Boksit që do të zhvillohet së shpejti, trajneri i Vllaznisë, Zef Gjoni, për herë të parë në karrierën e tij dorëzohet, duke thënë se skuadra shkodrane do të mjaftohet edhe me vendin e dytë përballë Tiranës, e cila ka të paktën 4 boksierë profesionistë. Ngritja e duarve lart kësaj radhe ka ardhur nga trajneri që ka fituar 22 tituj kampion, duke e bërë Vllazninë ekipin absolut në boksin shqiptar për faktin se sektori i sportit në Bashkinë e Shkodrës, vetë bashkia dhe sport klub Vllaznia nuk kanë asnjë interes për sportin e boksit dhe sportistët. Madje, pas këtij kampionati Zef Gjoni, siç konfirmoi në intervistën për “Panorama Sport”, mund të largohet si trajner i kuqebluve për të shkuar me ndonjë ekip tjetër, duke qenë se ka oferta, sepse sipas tij në Shkodër nuk mund të vijohet më në këtë gjendje.
“Ju falënderoj për interesin sepse sport klub Vllaznia dhe personat që paguhen në Bashkinë Shkodër për këto punë nuk kanë asnjë lloj interesi për boksin, jo vetëm për ne, pasi dihet në çfarë gjendje ka shkuar sport klub Vllaznia me të gjitha disiplinat e sporteve. Sa i përket kampionatit kombëtar do të jetë i fortë, sepse AIBA, Federata Botërore e Boksit, ka nxjerrë një rregull të ri që edhe boksierët profesionistë mund të marrin pjesë në boksin amator, pra në kampionat. Tirana sot për sot ka katër boksierë profesionistë dhe tre janë në
Itali, madje kanë bërë mbi 5 ndeshje profesioniste ku i kanë fituar të gjitha dhe ne do të përballemi me ta. Tirana është e bashkuar tashmë dhe është një ekip shumë i fortë, prandaj ne kemi marrë masat tona duke u stërvitur. Këtë radhë Vllaznia do të jetë e kënaqur edhe me vendin e dytë, sepse siç e thashë, interesi i personave që përmenda më lart, qoftë nga sport klub Vllaznia, por edhe Bashkia Shkodër është zero. Problemet financiare janë kryesoret që kemi. Ne aktualisht kemi dy boksierë në Gjermani, Kristian Demaj dhe Rexhildo Zeneli, që kanë shumë dëshirë të vijnë dhe t’i bashkohen Vllaznisë, por duhet marrë parasysh se ata lënë punën atje, stërvitjen dhe të paktën duhet t’u garantosh rrugën, pra biletën, apo edhe ndonjë pagesë, sepse janë ditët e punës që duhet t’i lënë. Ne s’kemi mundësi që t’ua plotësojmë këto kushte, sepse në këtë gjendje e kanë çuar sportin. Vetëm një biznes na ndihmon, por nuk mjafton kështu. Prandaj, këtë radhe ne do të ishim të kënaqur edhe me vendin e dytë,
sepse edhe vendi i dytë është nder. Të shohim gjatë javës se si do të shkojë stërvitja. Ne aktualisht në stërvitje kemi Vjerdhën, Kajoshin, Eljazajn, Kapajn e Hysën, i cili sapo është rikthyer pas pafajësisë dhe është duke u përgatitur për kampionat, po stërvitet fuqishëm. Gjendja e këtyre boksierëve është e mirë, por janë 10 pesha ku duhet të konkurrosh dhe nuk mund të rivalizojmë me vetëm 2-3 boksierë. Çdo peshë pikëzohet me 5 pikë dhe shpresojmë që deri në fund të ketë diçka që të përmirësohet. Sa u përket atyre që janë në bashki, shefi i klubit dhe punonjësit e tjerë nuk e dinë as kalendarin se çfarë aktivitetesh ka boksi dhe interesi i tyre nuk ekziston. Megjithatë, kur të mbarojmë kampionatin, do të flas më shumë. Kam disa oferta dhe ndoshta, duke parë drejtuesit se në çfarë gjendjeje po e çojnë boksin unë mund të përfaqësohem me ndonjë ekip tjetër dhe jo Vllazninë. Më vjen shumë keq, por në këtë gjendje nuk mund të vazhdohet dhe do të shoh ofertat e tjera që kam”. Senad Nikshiqi