“Botërori 2023” në basketboll, Shqipëria zbulon kundërshtarët
Ne dhe Kosova do ta nisim nga raundi i parë paraeliminator
Kampionati Botëror i Basketbollit për meshkuj në vitin 2023 ka ngritur ditën e djeshme siparin, me shortin e hedhur në Mienz të Zvicrës. Ky aktivitet do të nisë me dy faza paraeliminatore, ku në të parën do të jenë pikërisht dy përfaqësueset shqipfolëse, Shqipëria dhe Kosova, të ndara në dy grupe me nga 4 skuadra secila. Goglat kanë “dërguar” djemtë kuqezi në Grupin A, së bashku me Portugalinë, Qipron dhe Bjellorusinë, ndërkohë që Kosova e ka parë veten në Grupin B, ku do të gjejë përballë Sllovakinë, Islandën dhe Luksemburgun. Me t’u njohur me kundërshtarët e tyre, tashmë përfaqësuesja jonë do të ketë kohën e mjaftueshme në dispozicion për të marrë masat, në mënyrë që të përgatitet sa më mirë për duelin e parë, i cili do të luhet mes datave 17-25 shkurt të vitit 2020, ndërkohë që raundet e tjera të ndeshjeve do të jenë respektivisht më 23 nëntor-1 dhjetor 2020 dhe më 15-23 shkurt 2021.
RREGULLORJA - Sipas rregullores së këtij Botërori, Shqipëria (por edhe Kosova) duhet të renditet mes dy të parave, nëse kërkon të shpresojë për të provuar që të arrijë ëndrrën e madhe, ndonëse pas fazës së parë, në të dytën do të bashkohen 8 ekipe të tjera të ardhura nga kualifikueset e Kampionatit Europian 2021. Ndërkohë, për informacion, kjo Kupë Bote e koshit do të ketë një format shumëkombësh, duke qenë se ndeshjet e skuadrave finaliste të turneut të vitit 2023 do të zhvillohen në Azi, konkretisht të ndara mes Indonezisë, Japonisë dhe Filipineve. Shqipëria kujtojmë që rikthehet në parket pas muajit gusht, në të cilin u ndesh me Bjellorusinë dhe Danimarkën, ndeshje të vlefshme për kualifikueset e “Euro 2021”.