Çelhaka: Nuk kënaqem me veten, na ka munguar fati

Mesfushori i Tiranës, Jurgen Çelhaka, është surpriza e këtij sezoni. Titullar në shumë ndeshje, Çelhaka foli për momentin që po kalon te bardheblutë. Djaloshi 18-vjeçar u shpreh se pavarësisht se për momentin ka fituar konkurrencën në mesfushë me emra të rëndësishëm të grupit të Tiranës, i mbetet të punojë më fort për të ardhmen.

Nisja si titullar, e prisnit?

Vitin e kaluar nuk kam marrë shumë minuta dhe ishte diçka e re ta nisja titullar sezonin. Këtë vit jam ndier shumë mirë dhe besoj se kam bërë ndeshje të mira. Dua të vazhdoj kështu dhe të marr sa më shumë minuta.

Ftesa e munguar për Shpresat. Keni diçka për të thënë?

Nuk më takon mua që të flas për këtë çështje. Më takon të stërvitem fort për çdo ndeshje.

Konkurrencë e fortë në mesin e fushës, por ju e keni fituar? Është e vërtetë që kam fituar konkurrencën, pasi edhe ata më kanë ndihmuar shumë. Do t'ia lëmë kohës këtë gjë, sepse më mbetet të punoj shumë. Nuk duhet të kënaqem me veten.

Menaxhimi i rezultatit nuk ka qenë ai më i miri?

Kemi pasur mundësi të mira për ta mbyllur ndeshjen, si me Durrësin, si me Vlorën. Ky është fakt, që kemi pësuar në fund. Po të mbyllnim ndeshjet, edhe kundërshtarët do të demoralizoheshin dhe ne do kishim anë psikologjike më të fortë. Edhe me profesor Ardin kam qenë shumë mirë, por edhe me profesor Ahmatajn jam shumë mirë. Më jep më shumë besim dhe shpresoj të vazhdoj kështu. Mungesa e tifozëve do të ndikojë?

E vërtetë që do ndikojë shumë. Tifozët e Tiranës janë të shumtë në numër, është një mungesë e madhe për një derbi të Shqipërisë, si Tirana-Vllaznia. Do jetë një minus për ne, por do të punojmë fort ta fitojmë ndeshjen.