Deshamp me artileri të rëndë, për rinovim dhe kualifikim
Franca certifikon stadiumin me yjet, Mbape & Co për... festën
Kampionia e botës në fuqi, dy herë fituese e këtij trofeu (1998 dhe 2018) dhe dy herë fituesja e Kampionatit Europian (1984 dhe 2000) do të jetë në tapetin e stadiumit më të ri kombëtar më 17 nëntor. Didier Deshamp është kujdesur që në shoun e inaugurimit të impiantit modern të mos mungojë asnjë prej yjeve. Në listën e përpiluar prej trajnerit të "Gjelave" janë në përbërje të gjithë futbollistët më të mirë, nisur me Mbape e gjithkush tjetër që bën pjesë në një ndër organikat më të mira në botë për momentin.
LISTA
Kilië Mbape, Antuan Grizman, Kingslei Koman, Kante, Varan e Mandanda, janë vetëm disa prej futbollistëve më të mirë të momentit, nga sulmi në portë, teksa për francezët mungojnë vetëm portieri Lori dhe mesfushori Pogba, të dy të dëmtuar. Deshamp ka publikuar listën për ndeshjen kualifikuese ndaj Moldavisë më 14 nëntor në "Stade de France" si dhe më 17 nëntor në Tiranë, duke certifikuar në njëfarë mënyre edhe vendin ku do të luhet ndeshja e fundit kualifikuese e grupit.
DIDIER DESHAMP
Trajneri 51-vjeçar do të rikthehet sërish në Shqipëri, për një përballje ndaj kuqezinjve, e cila kulmon me pankinën e tij të 100-të në krye të Francës. "E kam përjetuar ndjesinë e 100-tës edhe si futbollist i Francës. Kjo tregon ehe jetëgjatësinë e një karriere në nivele të larta", është shprehur shkurtimisht Deshamp për ndeshjen ndaj Shqipërisë, e cila për të do të jetë një jubile i rëndësishëm i karrierës. Sipas "Le Parisien", Franca dhe specifikisht Deshamp, vjen në Shqipëri me misionin për të finalizuar kualifikimin dhe për të mbyllur çdo llogari të nevojshme për Europianin e ardhshëm si dhe për... rinovimin. Trajnerit i përfundon kontrata më 2020 dhe shtyrja e saj sigurisht pritet të bëhet para finaleve të kompeticionit të rëndësishëm në verën e ardhshme. Në 98 ndeshje që ka drejtuar, Deshamp ka koleksionuar 63 fitore, 18 barazime dhe 17 humbje në krye të "Gjelave".