Teuta pa Hoxhën në Shkodër, Çyrbja mban në ankth stafin
Pas barazimit me Tiranën në shtëpi, Teuta u ndal edhe në javën pasuese në një tjetër barazim, këtë herë pa gola në transfertë ndaj Luftëtarit. Përveç dy pikëve të lëna në Gjirokastër, trajneri Shkëmbi mbase mund të shqetësohet më shumë për repartin e prapavijës, pasi në takimin e ardhshëm ndaj Vllaznisë, në transfertë, durrsakët duhet t’i bëjnë llogaritë pa titullarin e mbrojtjes, Rustem Hoxha. Ai u ndëshkua me karton të verdhë dhe plotësoi numrin katër, kështu që është i pezulluar për duelin me shkodranët.
SYNIMET- Teuta e këtij sezoni nuk u ndërtua vetëm për Europën, por për diçka më shumë. Ndryshe nga vjet, qoftë edhe nën zë, këtë vit e kanë pranuar se ekipi do të guxonte edhe titullin. Jo më kot janë bërë shpenzime e janë afruar futbollistë me kosto, si nga tregu vendës dhe ai i huaj. Stafi pati dorë të lirë në zgjedhje, ndërsa durrsakët kanë katër javë që nuk fitojnë. Për herë të fundit kanë fituar më 18 tetor, ku mundën Flamurtarin 1-0 në “Elbasan Arena”. Barazimi i fundit në Gjirokastër dhe fakti që sulmi është shumë larg pritshmërive, ka bërë që te Teuta të mos lejohen më hapa falsë. Gjatë merkatos u afruan dy sulmues, të cilët erdhën me bujë në Durrës. Bëhet fjalë për Khalid, i cili në sezonin e shkuar ishte një lojtar që kishte spikatur në Superligën e Kosovës, si dhe Nikaç që vinte nga Mali i Zi. Shpesh trajneri Blendi Shkëmbi ka folur për gjendjen jo të mirë të dy lojtarëve, të cilët edhe në Gjirokastër nuk e gjetën rrugën e rrjetës. Po t’u hedhësh një sy statistikave, ajo që spikat është se durrsakët kanë shënuar më shumë vetëm se Luftëtari deri më tani. Teuta ka shënuar 8 gola, ndërsa Luftëtari ka gjashtë në 12 javë. Mjaft pak për një ekip që synon trofe dhe pjesëmarrjen në Kupat e Europës.
PËRGATITJET— Pas 48 orësh pushim, Teuta ka rifilluar nga puna. Me një seancë të zhvilluar pasdite ka startuar zyrtarisht edhe java anti-Vllaznia. Vështirësia është e madhe, megjithatë të besuarit e Bledi Shkëmbit besojnë se do t’ia dalin. Ndaj shkodranëve ekipi nuk do të jetë i plotë, duke i mos dhënë mundësinë trajnerit të përzgjedhë formacionin më të mirë. Tashmë kur kampionati ka hyrë në një fazë interesante, gabimet janë thuajse të ndaluara. Stafi teknik ka shpjeguar edhe programin e ditës. Ekipi ka vijuar normalisht stërvitjen me një seancë të plotë, ku fillimisht kanë zhvilluar ushtrime të ndryshme me përgatitësit atletikë dhe më pas gjithçka është zhvendosur në punën me top. Aspekti tekniko-taktik dhe mbi të gjitha ushtrime të ndryshme në veprime ofensive dhe defensive kanë qenë në fokusin e trajnerit Shkëmbi. Por ajo që ra në sy ishte që repartet punuan të veçuara. Sulmi është sektori që po merr vëmendjen më të madhe. Të paktën kjo u kuptua edhe dje, ndërsa trajneri kërkonte më shumë qarkullim topi, vertikalizime dhe inkursione nga lojtarët anësorë. Bledi Shkëmbi pret me ngulm që skuadra të vijojë me rezultatet pozitive, por edhe me lojën e bukur.
GJENDJA E EKIPIT— Teuta iu rikthye stërvitjes me mungesa për shkak të grumbullimeve me kuqezinjtë, si Kallaku dhe Beqja. Durrsakët janë duke e vlerësuar maksimalisht Vllazninë. Ajo që bie në sy është përgatitja në mënyrë individuale e Arbër Çyrbes, i cili për momentin po e shqetëson stafin teknik, pasi nuk dihet nëse do të jetë gati deri në sfidën me Vllazninë. Gjithsesi, Çyrbja është nën mbikëqyrjen e stafit mjekësor, ndërsa gjendja e tij do të jetë në vëzhgim çdo seancë.