Partizani-Erzeni, sot derbi shqiptar në Europë
Tomorri dhe Sako, në kor: Një spektakël për Shqipërinë
Një derbi shqiptar në volejboll për mesh kuj është surpriza e bukur e kompeticionit europian të këtij sporti, “Challenge Cup”. Partizani, kampion i Shqipërisë në fuqi, do të presë pasditen e sotme në orën 18:00, në sallën e lojërave “Feti Borova” skuadrën që shkurorëzoi sezonin e kaluar Erzenin, në një duel vajtje-ardhje për raundin e dytë të turneut, i cili pritet të jetë shumë emocionues, por pse jo edhe spektakolar, për faktin që kjo ndeshje do të vlejë një biletë për të avancuar më tej në Kupat e Europës. Mes “Demave” dhe shijakasve sot do të luhet përballja e tretë brenda këtij sezoni. Nëse Partizani triumfoi në gjysmëfinalen e Kupës së Shqipërisë, Erzeni i ishte përgjigjur duke e mposhtur në javën e parë të kampionatit. Por pa dyshim që kjo sfidë e radhës do të ketë brenda saj më shumë ambicie, më shumë stimuj, pasi luhet Europa, edhe pse kualifikimi do të vendoset pas dy javësh. Dhe për të gjithë dashamirësit e volejbollit, derbi historik në fjalë do të transmetohet në “RTSH”.
YLLI TOMORRI – Trajneri i Partizanit kërkon të mos u referohet dy dueleve të kaluara të këtij sezoni, por ndërkohë karikon skuadrën e tij si dhe vlerëson shumë kundërshtarin shijakas: “Pikësëpari dua të them se pjesëmarrja në Europë është një nder për ne, teksa pas shumë vitesh, ku Partizani ka qenë inekzistent në këto kompeticione, ne e kemi rikthyer këtë skuadër në nivele të larta. Ndeshjen ndaj Erzenit e kemi përgatitur me seriozitet, pasi grupin e lojtarëve e kam pasur të plotë. Shpresoj vetëm që të ofrojmë një volejboll të bukur në parket, - shpjegon Ylli Tomorri. – Baraspeshë totale me Erzenin deri tani? Nëse flasim për kampionatin shqiptar, skuadrat që rivalizojnë për titull janë 3, ne Erzeni dhe Tirana. Por fakti që ndaj Erzenit luajmë për një turne europian, kjo e bën këtë përballje mes nesh një histori krejt tjetër, ndaj është e kotë që të shohësh pas. E rëndësishme është të shikoni në aksion një Partizan të bukur, përballë skuadrës me të cilën ka lënë më shumë gjurmë, në vitet e fundit (Erzenin). Në të njëjtën kohë, nuk duhet të nxitojmë, duke qenë se kualifikimi nuk luhet në ndeshjen e parë, ndaj të jemi të përqendruar”.
ARBEN SAKO – Ndërsa kolegu-rival i Tomorrit, trajneri i Erzenit, Arben Sako, shpreson që ky derbi të jetë një fitore mbi të gjitha për volejbollin shqiptar, ndonëse pa diskutim objektivi është kualifikimi. “Sa ka ndryshuar Partizani nga fitorja jonë e fundit ndaj tyre? Shiko, unë merrem vetëm me problemet e skuadrës sime. Partizani është një skuadër pretendente për titullin, është përforcuar me lojtarë të huaj dhe do të jenë dinjitozë. Por sido që të shkojë në fund, e rëndësishme është që të fitojë volejbolli shqiptar. Si e pres ndeshjen e parë? Besoj se fakti që e nisim në fushën kundërshtare na favorizon. Jemi të mobilizuar për të fituar ndeshjen, ose në të kundërt të fitojmë sa më shumë sete që të jetë e mundur, duke parë edhe formulën e ‘Challenge Cup’. Gjithsesi, Partizani e di mjaft mirë se ne kemi një tjetër armë shumë të fortë ndaj tyre, tifozërinë e zjarrtë shijakase, të cilën e ftoj që të jetë sa më e madhe në numër, duke i garantuar se do të përjetojnë dy orë spektakël, që nuk e kanë parë ndonjëherë”.