Kosova në hall, dëmtohet gjiganti Vedat Muriqi

Trajneri Shaland pritet ta zëvendësojë gjigantin me një mes Rashanit dhe Nuhiut

Një lajm që do të kishte qenë më mirë të shmangej, por Kosova tashmë duhet të tregojë se është edhe më e fortë sesa dëmtimet e rëndësishme. Ndërsa në dy stërvitjet e fundit ishte raportuar për problemet e mesfushorit Erolind Shala, bomba e vërtetë ka ardhur ditën e djeshme: Vedat Muriqi nuk do të jetë në dispozicion për transfertën me Çekinë dhe me ndeshjen në Prishtinë, ndaj Anglisë, dy sfidat e fundit eliminatore për Europianin 2020. Gjiganti i sulmit të përfaqësueses kosovare, të paktën siç bën me dije federata vendëse e futbollit, ka pësuar një dëmtim në këmbë në ndeshjen e fundit, të luajtur me Fenerbahçen në kampionat, një dëmtim që duket se ka qenë i paralajmëruar, i mbartur prej pak kohësh, por klubi turk nuk e ka kursyer Muriqin, i cili kujtojmë se realizoi një dopietë me skuadrën nga Stambolli, në fundjavë. "Sulmuesi i Kombëtares së Kosovës, Vedat Muriqi, nuk do të jetë në gjendje të luajë në dy ndeshjet eliminatore të radhës, kundër Çekisë më 14 nëntor në Plzen; dhe kundër Anglisë më 17 nëntor në Prishtinë. Përkundrejt përpjekjeve maksimale dhe dëshirës së madhe të futbollistit për t'i ndihmuar shokët e Kombëtares në këto ndeshje të rëndësishme, ekzaminimet e bëra mjekësore dhe konsulta edhe me një staf mjekësor në Zvicër, gjithsesi e ka bërë të pamundur që Vedat Muriqi të mund të riaftësohej në kohë për këto dy ndeshje. Ndërkohë, për më shumë do të raportohet në orët e ardhshme", ishte njoftimi i FFK-së.

RASHANI E NUHIU - Për sa i përket atij që do të mund të zëvendësojë bomberin Vedat Muriqi, nga minuta e parë me Çekinë e Anglinë, trajneri Bernard Shaland po mendon për njërin mes Elbasan Rashanit dhe Atdhe Nuhiut, respektivisht sulmuesin e skuadrës norvegjeze të Odd-sit dhe të gjigantit të anglezëve të Shefilld Uensdejt. Sigurisht që si për Rashanin ashtu sikurse për Nuhiun do të jetë e vështirë të bëjnë që mungesa e Muriqit të mos ndihet.