Angli rekordesh, kualifikim “shtatëballësh” ndaj malazezëve

Anglia kualifikohet në "Euro 2020" pas fitores shtatëballëshe që arriti mbrëmë ndaj Malit të Zi. Kur ka mbetur edhe një ndeshje për t'u luajtur, ajo e së dielës me Kosovën, "tre luanët" e trajnerit Sauthgeit kryesojnë Grupin A me 18 pikë dhe pas tyre vjen Çekia me 3 pikë më pak, e cila gjithashtu u kualifikua pas fitores me përmbysje ndaj Kosovës. Suksesi i mbrëmshëm i anglezëve ka ndodhur në një ndeshje jubilare, takimi i 1000-të në rang kombëtareje. Një natë rekordesh për ishullorët, ku kapiteni Harri Kein shënoi tre gola për 18 minuta, Temi Abraham është golashënuesi i 430-të në historinë e kombëtares angleze. Anglia nuk shënonte 7 gola në shtëpi që nga tetori i 1987-ës, kur mundi Turqinë me rezultatin 8-0. Një dominim total i Anglisë, ku malazezët më shumë u lodhën për të nxjerrë topin nga rrjeta e tyre, ku vetëm në pjesën e parë e bënë pesë herë. Serinë e golave të fitores për anglezët e hapi Çembërlein në minutën e 11-të dhe tetë minuta më pas është radha e kapitenit Kein për të shënuar golin e dytë për ekipin dhe të parin personal. Në minutën e 24-t Herri Kein shënon dhe i ndryshon shifrat në 3-0. Në minutën e 3-0 Rashford shënon golin e katërt, ndërsa në 37-ën Kein realizon tripletën e tij dhe në shifrat 5-0 mbyllet pjesa e parë. Në pjesën e dytë anglezët luajnë më qetë, por në

minutën e 66-të shënojnë golin e gjashtë, por kësaj radhe mendojnë malazezët, ku Sofranac shkakton autogol. Por ndeshja nuk mbyllet me kaq, pasi në minutën e 84-t ka vend edhe për golin e talentit të Çelsit, Temi Abraham, i cili në fund vendosi të luajë për Anglinë dhe jo për kombëtaren e origjinës, Nigerinë. Të dielën anglezët do të jenë mysafirë të Kosovës, një ndeshje thjesht për statistikë, pasi verdiktet e kualifikimit në Grupin A janë vendosur tashmë, Anglia e para dhe Çekia e dyta.