Fetel i përgjigjet Vershtapenit: Koment i papjekur, e injoroj

Këtë fundjavë do të mbahet Çmimi i Madh i Brazilit që shënon edhe ndalesën e parafundit sezonale në Formulën 1. Ferrari mbërrin në Amerikën Latine pas një periudhe aspak të lehtë që është shoqëruar me akuza të rënda nga Maks Vershtapen. Piloti i Red Bullit është shprehur se "Kokëkuqja" ka përdorur një motor të parregullt. Në prag të garës së Brazilit ka ardhur edhe përgjigjja nga Sebastian Fetel: "Çdo njeri është i lirë të thotë atë që mendon, por ne kemi një mendim të ndryshëm. Në pesë vitet e fundit Mercedesi ka pasur një motor më të fortë dhe nëse tani gjërat janë kthyer në favorin tonë, shpresojmë që të vazhdohet kështu për pesë vitet e ardhshme", deklaroi Sebastian Fetel në prag të garës numër 100 me Ferrarin. Më pas piloti gjerman shton: "Nuk mendoj se ka nevojë të them shumë gjëra për këtë situatë. Komenti i bërë nga Vershtapen ka qenë i papjekur dhe nuk dua të bëj gjë tjetër përveçse ta injoroj. Ne duam të përgjigjemi në pistë. Hamilton ka bërë një sezon të madh dhe ishte e pritshme që do ta fitonte kampionatin", u shpreh Sebastian Fetel. SHARL LËKLERK

Për shkak të zëvendësimit të motorit "power unit", parashikohet një fundjavë e vështirë për pilotin tjetër të Ferrarit, Sharl Lëklerk. 22-vjeçari u shpreh kështu në konferencën për shtyp: "Për ne do të jetë një garë normale dhe do të përqendrohemi si gjithnjë në punën tonë. E dimë mirë se çfarë duhet të bëjmë dhe që nuk kemi asnjë lloj problemi. Absolutisht që nuk do të ketë presion shtesë mbi ne, pasi nuk kemi përse të tregojmë diçka ndryshe nga herët e tjera. Jemi të vetëdijshëm për atë që bëjmë dhe mund të them që jemi të kënaqur me atë që po shfaqim", tha Sharl Lëklerk duke i injoruar plotësisht akuzat e bëra nga Maks Vershtapen. Kujtojmë që gara e Çmimit të Madh të Brazilit starton të dielën në orën 18:10.